Reading Article
Public date : 29, Jul 2019 (8,972 Read)
បុគ្គលអ្នកសម្រួមមិនសន្សំនូវពៀរឡើយ
|
|
|
បុគ្គលអ្នកសម្រួមមិនសន្សំនូវពៀរឡើយ
នៅក្នុងអត្តភាពជាមនុស្ស គឺមិនគួរសាងភាពច្រឡើសទៅលើសង្គមនៃមហាជន ជាពិសេសគឺមិនត្រូវសាងនូវពៀរដាក់ឲ្យខ្លួនឯងឡើយ។ ចិត្តដែលមិនធ្លាប់មានការអប់រំ គឺជាចិត្តដែលនឹងសាងនូវពៀរឲ្យដល់ខ្លួនឯងនិងអ្នកដទៃផងដែរ។ សេចក្ដីមិនសង្រួម គឺ ជាប្រភពនៃការសាងនូវពៀរវេរា ហើយពៀរវេរាគឺតែងតែនាំមកនូវសេចក្ដីទុក្ខហើយសេចក្ដីទុក្ខ វានឹងបៀតបៀនដល់ជនដែលនូវមានពៀរជាប្រាកដ។ មានមនុស្សជាច្រើន ដែលមិនបានយល់ហេតុផល ឬមិនបានយល់ពីពៀរវេរាច្បាស់លាស់ នូវពេលដែលមានអ្នកដទៃមកបៀតបៀន ក៏មានចិត្តនឹកក្ដៅក្រហាយ អន្ទះអន្ទែងរងក្ដីឈឺចាប់នឹងមានការស្ដីបន្ទោស ដល់អ្នកដែលបានមកបៀតបៀននោះឯង ថាម៉េចបានជាយ៉ាងនេះ ម៉េចបានជាយ៉ាងនោះជាដើម។ តាមពិតរឿងនេះគឺវាមានតាំងពីជាតិមុនមកម្លេះ តែអ្នកមិនគិតដល់រឿងពីអតីត ដែលអ្នកធ្លាប់បានធ្វើហើយនោះទេ។ សេចក្ដីខាងលើនេះ ខ្ញុំនឹកនៅ ក្នុងចិត្ត ហើយសរសេរដោយសង្ខេបប៉ុណ្ណេះគ្រាន់បានគ្រប់គ្នាគិត។ តទៅនេះ ខ្ញុំនឹងរៀបរាប់ពីការសង្រួមដែលនាំឲ្យរួចចាកពៀវ បើរួចចាកពៀរហើយ នឹងទទួលបាននូវក្ដីសុខដែលជាសេចក្ដីសុខមិនមាននូវពៀរវេរាជាសេចក្ដីសុខដែលមិនអាចនឹងរៀបរាប់ឬគណនាបានឡើយ។ ពៀរ តែងមិនមានដល់បុគ្គល ដែលបានសង្រួមឥន្ទ្រិយ៍មានភ្នែកជាដើម។ សូមពុត្ធបរិស័ទទាំងឡាយ ត្រូវតែព្យាយាមសង្រួមឲ្យបានល្អ កុំឲ្យមាននូវក្ដីប្រមាទឲ្យសោះ ត្រូវតែខំចម្រើននូវសតិស្មារតី ឲ្យបានខ្ជាប់ខ្ជួន កុំធ្លោយ កុំប្រហេស ត្រូវប្រកាន់នូវភាពបរិសុទ្ធឲ្យដល់ខ្លួនឯង។ បើអ្នកមិនចង់ឲ្យអ្នកដទៃ គេមកបៀតបៀនអ្នកទេ គឺ ខ្លួនអ្នកត្រូវតែសង្រួមឲ្យបានប្រសើរ កុំឲ្យធ្លាក់ទៅក្នុងរណ្ដៅនៃពៀរវេរាឲ្យសោះ កុំចាប់ចិត្តខ្លួនឯងឲ្យលេងជាមួយនឹងបាបធម៌ គឺការមិនសង្រួមទៅនោះគឺ ពិតជាគ្មាននរណាគេមកបៀតបៀនដល់អ្នកឡើយ។ ដកស្រង់ចេញពីសៀវភៅ ឃ្លាំងគំនិតដែលគួរសិក្សា ដោយ៥០០០ឆ្នាំ |
