Reading Article
Public date : 28, Jul 2019 (11,013 Read)
ពុក
|
|
|
ពុក
ពន្លឺរស្មីនៃព្រះអាទិត្យ មានសារៈសំខាន់ណាស់សម្រាប់ភពផែនដី និងមនុស្សទាំងឡាយដែលរស់នៅលើផែនដីនេះ។ ពេលណាដែលព្រះអាទិត្យរះឡើងបញ្ចេញរស្មី សាយភាយពេញផ្ទៃភាល័យ ផែនដីទាំងមូលក៏មានភាពស្រស់បំព្រង ពេញទៅដោយសោភ័ណល្អត្រកាល កម្ចាត់បង់នូវភាពងងឹតអន្ធការអស់ពីផែនដី បន្សល់នៅតែភាពដ៏ស្រស់ស្អាតក្រៃលែងដែលចាំងចែងទៅដោយពន្លឺរស្មីនៃព្រះអាទិត្យ មនុស្សម្នាទាំងឡាយ ក៏ចេញដំណើរទៅប្រកបរបរចិញ្ចឹមជីវិតតាមមធ្យោបាយរៀងៗខ្លួន។ តែប្រសិនបើ ថ្ងៃណាដែលព្រះអាទិត្យមិនរះឡើងនោះ តើភពផែនដីទាំងមូលនឹងទៅជាយ៉ាងណាទៅ? ប្រាកដជាងងឹតសូន្យឈឹងមើលអ្វីលែងឃើញមិនខាន ហើយតើមនុស្សយើងអាចរស់ទៅបានទេ ប្រសិនបើព្រះអាទិត្យមិនរះឡើងរហូតនោះ សេចក្ដីលំបាកវេទនា ភាពដែលគួរឲ្យរន្ធត់តក់ស្លុត ភ័យខ្លាចនឹងកើតមានឡើងប្រាកដ នៅលើផែនដីនេះមិនខាន។
សេចក្ដីនេះយ៉ាងណា ជីវិតរបស់កូនដែលមានពន្លឺរស្មី ដោយសារមានពុកក៏យ៉ាងនោះដែរ។ ពុកគឺជារស្មីនៃដួងចិត្តរបស់កូន គ្រប់ពេលវេលាដែលកូននៅក្បែរពុក ពុកតែងតែផ្ដល់ភាពកក់ក្ដៅដល់កូនជានិច្ច មិនតែប៉ុណ្ណោះពុកថែមទាំងផ្ដល់ដំបូន្មានល្អៗដល់កូនទៀតផង។ ពេលខ្លះពុកធ្វើកាច ធ្វើខឹងដាក់កូន តែក្នុងចិត្តរបស់ពុកគឺចង់ឲ្យកូនល្អ។ ពុក ពិតជាមនុស្សដែលល្អយ៉ាងក្រៃលែងណាស់សម្រាប់កូន ព្រោះរាល់កាយវិការ ការព្រឹត្តរបស់ពុកមកលើកូន គឺបង្កប់ទៅដោយភាពមេត្តា ករុណាការស្រលាញ់អាណិតចំពោះកូន។ ពុក ជាវិរៈបុរស ដែលចាំជួយកូន រាល់ពេលដែលកូនមានសេចក្ដីលំបាក ព្រោះរាល់ពេលដែលកូនមានទុក្ខលំបាកម្ដងៗ ពុងតែងជួយសម្រាលទុក្ខកូនជានិច្ច មិនទុកកូនចោលឲ្យនៅម្នាក់ឯងឡើយ។ ពុក មានដួងហឬទ័យស្មោះសរ ល្អបរិសុទ្ធចំពោះកូន រកអ្វីផ្ទឹមគ្មានឡើយ ព្រោះកែវភ្នែកទាំងគូរបស់ពុកដែលសម្លឹងមករកកូន គឺមានភាពស្រទន់ ពេញដោយសេចក្ដីស្រលាញ់ វាចាដែលពុកនិយាយមករកកូនក៏មិនបង្កប់ដោយភាពពិសពុល តែងដក់ជាប់ដោយការអប់រំជានិច្ច។ ពុក លំបាកក្នុងការធ្វើការងារ ក្ដៅរងារ រងទុក្ខគ្រាំគ្រា ធ្លាក់ខ្លួនឈឺមិនសូវជា យ៉ាងណា ក៏ពុកនៅតែញញឹមក្នុងការងារនោះ ដោយភាពភក្ដីព្រោះពុកធ្វើដើម្បីជីវិតកូន។ ពុក តស៊ូចិញ្ចឹមកូន មិនដែលត្អូញត្អែរថាលំបាកនឿយហត់ឡើយ ពុកចិញ្ចឹមកូនតាំងពីតូច រហូតដល់កូនធំដឹងក្ដី ដោយកម្លាំងញើសឈាមរបស់ពុក។ ពុក លះបង់ទាំងពេលវេលា លះបង់ទាំងកម្លាំងកាយ ទាំងកម្លាំងចិត្ត បូជាជីវិតចំពោះកូន ឲ្យកូនបាននូវសេចក្ដីសុខ បាននូវភាពកក់ក្ដៅ។ ពុក ធ្វើអ្វីៗតែងគិតដល់កូនជានិច្ច ពុកគិតពីជីវិតកូន គិតពីអនាគតរបស់កូន គិតខ្លាចកូនឈឺសុខភាពមិនល្អ ខ្លាចកូនមិនបាននូវសេចក្ដីសុខ ខ្លានកូនរស់នៅមិនកក់ក្ដៅ គិតខ្លាចកូនបរិភោគអាហារមិនគ្រប់គ្រាន់ ពុកគិតគ្រប់បែបយ៉ាងជុំវិញជីវិតកូន។ ពុក តែងមានបំណងប្រាថ្នា ចង់ឲ្យកូនបាននូវសេចក្ដីសុខគ្រប់ពេល ឲ្យកូនមានជីវិតមួយដ៏ល្អក្នុងការរស់នៅក្នុងក្រុមគ្រួសារ និងជាមួយមនុស្សល្អនៅក្នុងសង្គម ជាពិសេសពុកចង់ឲ្យកូន ជាអ្នកដឹងល្អអាក្រក់ ដឹងទាបខ្ពស់ ដឹងគុណទោស និងដឹងខុសត្រូវ។ ពុក តែងដាស់តឿនក្រើនរំលឹកកូន ជារៀងរាល់ថ្ងៃ អោយកូនប្រឹងប្រែងសិក្សារៀនសូត្រ ព្រោះគ្មានអ្វីដទៃដែលអាចជួយជីវិតកូនជារៀងរហូតបាន ក្រៅអំពីចំណេះវិជ្ជាឡើយ ពុកអាចជួយកូនបានតែពេលដែលពុកនៅមានជីវិតប៉ុណ្ណោះ លុះពុកអស់ជីវិតទៅពុកមិនអាចជួយកូនបានទៀតឡើយ គឺមានតែចំណេះវិជ្ជាទេ ដែលអាចជួយកូនជំនួសពុកបាន។ ពុក គ្មានអ្វីល្អប្រគល់ឲ្យកូន ក៏ពិតមែន តែពុកបានប្រគល់នូវជីវិតមួយដ៏ល្អប្រសើរដល់កូន ដែលធ្វើឲ្យកូន មានថ្ងៃនេះ។ ពុក គ្រប់ពេលវេលាដែលកូននៅជាមួយពុកកូនស្គាល់តែភាពថ្នាក់ថ្នម និងភាពកក់ក្ដៅ ដែលពុកបានផ្ដល់ឲ្យកូន តែពេលវេលាដែលកូនបែកពីពុកកូនមិនបានស្គាល់ និងមិនបានទទួលភាពកក់ក្ដៅពីនរណាម្នាក់ ឲ្យដូចជាពុកឡើយ កូនស្គាល់តែភាពល្វីជូរចត់ ដែលកើតមានប្រាកដក្នុងជីវិតកូន នៅពេលដែលអត់មានពុក។ ពុក ព្រោះតែដើម្បីជីវិតកូន មិនថាពុកត្រូវស្លាប់ទាំងខ្លួន ក៏ពុកហ៊ានទទួលរងជំនួសកូនដែរ ទោះពុកត្រូវធ្វើជាខ្ញុំបម្រើគេ ជាកូនឈ្នួលដាច់ថ្លៃរបស់គេ ក៏ពុកគ្មានរារែកឡើយ ឲ្យតែពុកអាចចិញ្ចឹមកូនបានរស់ប៉ុណ្ណឹង គឺប្រសើរណាស់សម្រាប់ពុក។ ពុក ទោះត្រូវឈឺរងារ ដេកវេទនានៅលើគ្រែហើយក៏ដោយ ក៏ពុកនៅតែគិតព្រួយបារម្ភពីកូនជានិច្ច ខ្លាចកូនគ្មានអ្នកជួយថែរក្សា ខ្លាចកូនលំបាកនៅពេលដែលគ្មានរូបពុក។ ពុក ហេតុអ្វីបានជាពុកល្អចំពោះកូនម្លេះ?ហើយហេតុបានជាកូនខ្លះមើលមិនឃើញសេចក្ដីល្អរបស់ពុកអញ្ចឹង? ឬមួយក៏កូនគិតថា ពុកចាស់ជរាហើយ នៅធ្វើការងារឲ្យកូនមិនបានយូរទេ ដូច្នេះហើយពុកគ្មានប្រយោជន៍អ្វីសម្រាប់កូនទៀតឡើយ។ នេះហើយឬជាការតបស្នងរបស់កូនមកលើពុក ការលះបង់ដ៏ធំធេងរបស់ពុក វាគ្មានន័យអ្វីសម្រាប់កូនទេឬ? ពុកតែម្នាក់អាចចិញ្ចឹមកូនដល់ដប់ម្ភៃនាក់រស់ ចុះហេតុអ្វីបានជាកូនដប់ម្ភៃចិញ្ចឹមពុកតែម្នាក់មិនរស់? តើវាមិនអយុត្តិធម៌ពេកទេឫចំពោះពុក។ ការលះបង់របស់ពុកចំពោះកូន គឺវាគ្មានព្រំដែនឡើយ តែចំពោះកូនវិញបានលះបង់អ្វីខ្លះ ដើម្បីពុកហើយឬនៅ? ពេលដែលពុកឈឺ ពុកមិនសូមឲ្យកូនយកអ្វីមកជួនឡើយ ពុកសូមត្រឹមបានឃើញមុខកូនប៉ុណ្ណឹង ពុកអស់ចិត្តហើយ ព្រោះពុកស្រលាញ់កូន ពុកត្រូវការកូន ពុកចង់ឃើញមុខកូន មុនពេលដែលពុកឃ្លាតឆ្ងាយពីកូនទៅ តើកូនៗឮទេ? កូនស្ដាប់ឲ្យច្បាស់ណា ថា ពុកពិតជាស្រលាញ់កូនខ្លាំងណាស់!!! ដកស្រង់ចេញពីសៀវភៅ ដួងហឬទ័យនៃអ្នកមានគុណ ដោយ៥០០០ឆ្នាំ |
Articles you may like
