ការឈ្លាសវៃមិនដែលស្លាប់ដោយឧបាយកលអ្នកដទៃ

Audio

រឿងចចកឈ្មោះបូតិមំសៈ
( ចាក បូ. ន. )
( ការឈ្លាសវៃមិនដែលស្លាប់ដោយឧបាយកលអ្នកដទៃ )

បានដឹងថា កាលកន្លងទៅជាយូរលង់ណាស់ហើយ មានហ្វូងសត្វចៀមជាច្រើន នៅអាស្រ័យក្នុងគុហារក្បែរភ្នំទៀបហេមវន្តប្រទេស ។ ក្នុងចំណោមសត្វទាំងឡាយនោះ មានមេចៀម១ ឈ្មោះមេណ្ឌមាតា ជាសត្វវាងវៃប្រសប់ក្នុងឧបាយគ្រប់យ៉ាង ។ ក្នុងទីមិនឆ្ងាយពីគុហា ជាលំនៅនៃចៀមទាំងឡាយនោះ មានសត្វចចក១ ឈ្មោះបូតិមំសៈ និងភរិយាឈ្មោះវេណីយានៅរួមសំវាសគ្នាក្នុងគុហា ១ ដែរ ។

ចចកឈ្មោលចចកញីជាប្តីប្រពន្ធនោះ បានមានមធ្យោបាយដ៏ប្រពៃខាងការប្រវ័ញ្ចន៍ បោកសម្លាប់សត្វចៀមទាំងឡាយស៊ីអស់ជាច្រើន និងចង់ស៊ីសាច់មេចៀមឈ្មោះ មេណ្ឌមាតាជាសត្វឈ្លាសវៃនោះទៀត ទើបពោលប្រាប់ប្រពន្ធថា ចូរនាងយកមេចៀមឈ្មោះមេណ្ឌមាតានោះ ជាសម្លាញ់ចុះ ! កាលបើសេចក្តីស្រលាញ់កើតឡើងរវាងនាង និងមេចៀមនោះហើយ អញនឹងដេកធ្វើពុតជាស្លាប់ នាងចូលទៅជិតមេចៀមពោលប្រាប់ថា " ហ៊ី! ប្តីខ្ញុំស្លាប់ទៅហើយ ឯខ្ញុំវៀរតែនាងចេញគ្មានញាតិណាមួយសោះសូមអញ្ជើញនាងទៅជួយធ្វើពិធីសរីរកិច្ចដល់ប្តីខ្ញុំ " លុះនាងពោលយ៉ាងនេះហើយចូរនាំមេណ្ឌមាតានោះមក បើមេចៀមនោះលុះក្នុងបវញ្ចនកិច្ចរបស់នាងមែន អញនឹងលោតទៅខាំវាត្រង់កឲ្យស្លាប់តែម្តង ។

មេចចកធ្វើតាមពាក្យរបស់ប្តីខ្លួនសព្វគ្រប់ ក៏បាននាងមេណ្ឌមាតានោះធ្វើជាសម្លាញ់មែន ហើយពោលប្រាប់រឿងរ៉ាវតាមលំអានពាក្យស្វាមី ។ មេចៀមពោលថា ប្តីនាងស៊ីញាតិរបស់ខ្ញុំអស់ច្រើនគ្នាហើយ ឥឡូវចង់ស៊ីខ្ញុំទៀតឬ ? ខ្ញុំខ្លាចណាស់មិនហ៊ានទៅទេ ។ មេចចកថា កុំខ្លាចអី មិនដែលល្បីថាសត្វស្លាប់ហើយអាចធ្វើឲ្យគេភ័យទៀតទេហើយនាំនាងមេណ្ឌមាតានោះមក ។ ចចកបូតិមំសៈ ឮសូរជើងសត្វទាំងពីរនោះមក គិតថា យី! អស្ចារ្យណាស់ មីចៀមនេះលុះក្នុងអំណាចបវញ្ចនកិច្ចប្រពន្ធអញហើយតើ ហើយអើតក្បាលរមិលមើល ។

មេចៀមឃើញអាការៈចចកធ្វើដូច្នោះ ទើបស្រែកអាក្រោះយ៉ាងខ្លាំងដោយពាក្យអាស្រូវភាសថា " អើអាចង្រៃនេះមានធម៌លាមកណាស់វើយ វាពុតធ្វើជាស្លាប់ដេកលក់វាហី ប្រុងបញ្ឆោតសម្លាប់អញធ្វើអាហារចំណីរបស់វា បើកុំតែអញឃើញទាន់ម្ល៉េះសមជាឆ្ងាញ់វាយ៉ាងណាទៅអេះ " ហើយងាកក្បាលស្ទុះបោលយ៉ាងលឿនទៅ ។ មេចចកវេណិយាអស់សង្ឃឹម ហើយក៏ចូលទៅស្តីបន្ទោសចចកជាប្តីខ្លួននោះដោយគាថាថាៈ

ត្វំ ខោសិ សម្ម ឧម្មត្តោ ទុម្មេធោ អវិចក្ខណោ
យោត្វំ មតាលយំ កត្វា អកាលេនវិបេក្ខសិ ។

នែ! អ្នកចង្រៃអ្នកណាធ្វើពុតជាស្លាប់ រមិលមើលខុសកាលអ្នកនោះជាសត្វឆ្កូត មានគំនិតអាក្រក់ មិនចេះពិចារណា ។

ចចកឈ្មោះបូតិមំសៈទាល់បុច្ឆ ក៏នៅស្ងៀមបើកតែភ្នែកសំឡឹងប្រពន្ធមឹសៗ រុយទុំលែងទាំងដេញថែមទៀត ព្រោះប្រពន្ធជាន់កែងជាប់ ៕

ដកស្រង់ចេញពីសៀវភៅប្រជុំនិទានជាតក

ដោយ៥០០០ឆ្នាំ

Array
(
    [data] => Array
        (
            [0] => Array
                (
                    [shortcode_id] => 1
                    [shortcode] => [ADS1]
                    [full_code] => 
                )

            [1] => Array
                (
                    [shortcode_id] => 2
                    [shortcode] => [ADS2]
                    [full_code] => c
                )

        )

)

ការឈ្លាស​​​វៃ​មិន​ដែល​ស្លាប់​ដោយ​ឧ​បាយ​កល​អ្នក​ដ​ទៃ

ការឈ្លាសវៃមិនដែលស្លាប់ដោយឧបាយកលអ្នកដទៃ