Reading Article
Public date : 25, Jul 2019 (9,517 Read)
បុត្តសូត្រ
|
|
|
បុត្តសូត្រ
(បិដកលេខ ៤៤ ទំព័រ ៨៥ ដល់ ៨៦) ម្នាលភិក្ខុទាំងឡាយ មាតាបិតា ពិចារណាឃើញហេតុ ៥ យ៉ាងនេះ រមែងចង់បានបុត្រដែលកើតក្នុងត្រកូល ។ ហេតុ៥ យ៉ាងដូចម្តេចខ្លះ ។ គឺបុត្រដែលយើងចិញ្ចឹមហើយ នឹងចិញ្ចឹមយើងវិញ ១ បុត្រនឹងជួយធ្វើកិច្ចការយើង ១ វង្សត្រកូលនឹងស្ថិតនៅយូរ ១ បុត្រប្រតិបត្តិទទួលយកមត៌ក ១ មួយទៀត បុត្រនឹងឧទ្ទិសទក្ខិណាទានឲ្យដល់យើង ដែលធ្វើមរណកាលទៅកាន់លោកខាងមុខ ។ ម្នាលភិក្ខុទាំងឡាយ មាតាបិតាកាលពិចារណាឃើញហេតុ៥ យ៉ាងនេះ រមែងចង់បានបុត្រដែលកើតក្នុងត្រកូល ។ បញ្ចដ្ឋានានិ សម្បស្សំ បុត្តំ ឥច្ឆន្តិ បណ្ឌិតា តតោ វា នោ ភរិស្សតិ កិច្ចំ វា នោ ករិស្សតិ កុលវំសោ ចិរំ តិដ្ឋេ ទាយជ្ជំ បដិបជ្ជតិ អថ វា បន បេតានំ ទក្ខិណំនុប្បទស្សតិ ឋានានេតានិ សម្បស្សំ បុត្តំ ឥច្ឆន្តិ បណ្ឌិតា តស្មា សន្តោ សប្បុរិសា កតញ្ញូ កតវេនិនោ ភរន្តិ មាតាបិតារោ បុព្វេ កតមនុស្សរំ ករោន្តិ នេសំ កិច្ចានិ យថាតមបុព្វការិនំ ឱវាទការី ភតបោសី កុលវំសំ អហាបយំ សទ្ធោ សីលេនសម្បន្មោ បុត្តោ ហោតិ បសំសិយោតិ ។ អ្នកប្រាជ្ញទាំងឡាយ កាលបើពិចារណាឃើញហេតុទាំង៥ យ៉ាងរមែងចង់បានបុត្រ គឺបុត្រដែលយើងចិញ្ចឹមហើយ នឹងចិញ្ចឹមយើងវិញ នឹងធ្វើកិច្ចការដល់យើងវង្សត្រកូលនឹងស្ថិតនៅយូរ ប្រតិបត្តិគួរដើម្បីទទួលយកមត៌ក មួយទៀត នឹងឧទ្ទិសទក្ខិណាទានឲ្យដល់យើងដែលទៅកាន់លោកខាងមុខ អ្នកប្រាជ្ញទាំងឡាយ កាលបើពិចារណាឃើញហេតុទាំង៥ យ៉ាងនេះហើយ រមែងចង់បានបុត្រ ហេតុដូច្នោះ ពួកសប្បុរសអ្នកស្ងប់រំងាប់ជាកតញ្ញូកតវេទិបុគ្គល កាលរលឹកឃើញនូវឧបការគុណដែលលោកធ្វើហើយក្នុងកាលមុន ក៏រមែងចិញ្ចឹមមាតាបិតារមែង ជួយធ្វើកិច្ចការរបស់បុព្វការីទាំងនោះ តាមសមគួរ ។ បុត្រអ្នកធ្វើតាមឳវាទ ចិញ្ចឹមមាតាបិតា ដែលលោកបានចិញ្ចឹមខ្លួនមក ហើយ មិនញ៉ាំងវង្សត្រកូលឲ្យសាបសូន្យ ជាអ្នកមានសទ្ធា បរិបូណ៌ ដោយសីល រមែង ជាទីសរសើរអ្នកផង ទាំងពួង ។ អត្តបទនេះដកស្រង់ចេញពីសៀវភៅៈ ទានកថា រៀបរៀងដោយៈ អគ្គបណ្ឌិត ធម្មាចារ្យ ប៊ុត សាវង្ស វាយអត្តបទដោយៈ កញ្ញា ជា ម៉ានិត ដោយ៥០០០ឆ្នាំ |
