Reading Article
Public date : 06, Nov 2021 (13,950 Read)
ពុទ្ធកិច្ចរបស់ព្រះសម្មាសម្ពុទ្ធ
|
|
|
ពុទ្ធកិច្ចរបស់ព្រះសម្មាសម្ពុទ្ធ
នៅពេលដែលយើងទាំងអស់គ្នា បានអានអំពី ពុទ្ធកាលរបស់ព្រះអង្គហើយនោះ ពេលនេះយើងនឹងបានដឹងអំពីកិច្ចការរបស់ព្រះអង្គខ្លះ ៗ ទុកជាមិនបានសិក្សាពិស្តារយ៉ាងណាក៏ដោយ តែសូមពុទ្ធបរិស័ទសិក្សានូវពុទ្ធកិច្ចរបស់ព្រះអង្គដោយសង្ខេបនេះចុះ ។ កិច្ចរបស់ព្រះពុទ្ធ គឺការរវល់សម្រាប់ព្រះសព្វញ្ញូពុទ្ធ មានស្តេចយាងចេញទៅបិណ្ឌបាតពីព្រឹកព្រលឹម និងទ្រង់ត្រាស់សម្តែងធម៌ដល់ពុទ្ធបរិស័ទជាដើម ។ រីឯកិច្ចរបស់ព្រះពុទ្ធនោះមាន ៥ យ៉ាងគឺ ៖ ១ បុរេភត្តកិច្ច កិច្ចដែលព្រះពុទ្ធត្រូវបំពេញក្នុងពេលមុនភត្ត គឺតាំងពីពេល អរុណរះទៅទល់នឹងពេលថ្ងៃត្រង់ គឺទ្រង់បិណ្ឌបាត ។ ២ បច្ឆាភត្តកិច្ច កិច្ចដែលព្រះពុទ្ធត្រូវបំពេញក្នុងពេលក្រោយភត្ត គឺតាំងពីថ្ងៃត្រង់ទៅទល់នឹងពេលល្ងាច ទ្រង់សម្តែងធម៌ ។ ៣ បរិមយាមកិច្ច កិច្ចដែលព្រះពុទ្ធត្រូវបំពេញក្នុងយាមខាងដើមនៃរាត្រី គឺតាំងពីពេលព្រលប់ទៅទល់នឹងពេលកណ្តាលអធ្រាត្រ ( ទ្រង់ប្រទានឱវាទដល់ភិក្ខុសង្ឃទាំងឡាយ ) ។ ៤ មជ្ឈិមយាមកិច្ច កិច្ចដែលព្រះពុទ្ធត្រូវបំពេញក្នុងយាមកណ្តាលរាត្រី គឺពេលកណ្តាលអធ្រាត្រទ្រង់ឆ្លើយបញ្ហាទេវតាមកសាកសួរ ។ ៥ បច្ឆិមយាមកិច្ច កិច្ចដែលព្រះពុទ្ធត្រូវបំពេញក្នុងយាមខាងចុងនៃរាត្រី គឺតាំងពីពេលបន្ទាប់កណ្តាលអធ្រាត្រទៅទល់នឹងពេលអរុណរះ ( ទ្រង់ត្រូវមើលសត្វលោកដែល នឹងអាចសម្រេចធម៌ ដែលគួរព្រះអង្គទៅប្រោស មើលឧបនិស្ស័យសត្វក្នុងមួយយប់ពីរដង គឺក្នុងពេលជិតភ្លឺម្តង ពេលល្ងាចម្តង ។ ពេលជិតភ្លឺទ្រង់ប្រមើល ពីកណ្តាប់មាត់ចក្រវាលរហូតមកទល់ព្រះគន្ធកុដិ, ពេលល្ងាចទ្រង់ប្រមើល មើលព្រះគុន្ធកិដិ រហូតដល់ទៅកណ្តាប់មាត់ចក្រវាល ។ ពុទ្ធភាសិតៈ បុព្វណ្ហេ បិណ្ឌបាតញ្ច សាយណ្ហេ ធម្មេទេសនំ បទោសេ ភិក្ខុឱវាទំ អឌ្ឍរត្តេ ទេវបញ្ហានំ បច្ចូសេវ គតេ កាលេ ភព្វាភព្វេ វិលោកនំ ឯតេ បច្ចវិធេ កិច្ចេ វិសោធេតិ មុនិបុង្កវោតិ ។ ព្រះសម្មាសម្ពុទ្ធជាចម្បងជាងអ្នកប្រាជ្ញ ទ្រង់ជម្រះនូវពុទ្ធកិច្ចទាំងឡាយ ៥ ប្រការនេះ គឺក្នុងពេលព្រឹកស្តេចទៅបិណ្ឌបាត ១ ក្នុងពេលល្ងាចទ្រង់សម្តែងធម៌ទេសនា ១ ក្នុងពេលព្រលប់ទ្រង់ប្រទានឱវាទដល់ពួកភិក្ខុ ១ ក្នុងពេលអធ្រាត្រទ្រង់ដោះប្រស្នានៃទេវតា ១ ក្នុងពេលជិតភ្លឺទ្រង់ប្រមើល មើលនូវសត្វលោកដែលគួរត្រាស់ដឹង និងមិនគួរត្រាស់ដឹង ១ ។ ដកស្រង់ចេញពីសៀវភៅ ក្តីសង្ឈឹមអ្នកមានគុណ រៀបរៀងដោយៈ ភិក្ខុ ចិន្ត កវី ទូច ចន្ថា វាយអត្ថបទដោយៈ ឧបាសក សូត្រ តុលា ដោយ៥០០០ឆ្នាំ |
