អានអត្ថបទ
ផ្សាយ : ២៩ កក្តដា ឆ្នាំ២០១៩ (អាន: ១៦,៥៧៨ ដង)
សម្បត្តិស្ដេចចក្រពត្តិ
|
|
|
សម្បត្តិស្ដេចចក្រពត្តិ
ស្ដេចចក្រពត្តិ ជាស្ដេចធំគ្រប់គ្រងលើពិភពនៃមនុស្សទាំងអស់ ប្រកបដោយសុចរិតធម៌ ហើយដឹកនាំពពួកជនឲ្យកាន់សីល ៥ បានទៀតផង។ ព្រះអង្គមានរតនៈ ៧ ប្រការ ១- ចក្ករតនៈនាំចតុរង្គសេនាហោះទៅគ្រប់ទីកន្លែង ២- ហត្ថិរតនៈ ដំរីដែលអាចហោះបាន
៣- អស្សរតនៈ សេះដែលអាចហោះបាន
៤- មណីរតនៈ កែវមណីភ្លឺខ្លាំងពេលយប់
៥- ឥត្ថីរតនៈ មហេសីដ៏ល្អល្អះក្លិនក្រអូប
៦- គហបតិរតនៈ នាយឃ្លាំងដ៏ពូកែរកទ្រព្យ
៧- បរិនាយករតនៈ ព្រះរាជបុត្រច្បងគ្រប់គ្រងការងារ ជំនួសព្រះរាជបិតា។
កាលបើស្ដេចចក្រពត្តិប្រព្រឹត្តធម៌ រតនៈ ៧ ប្រការក៏រមែងសម្រេចដោយបរិបូណ៌ ព្រះអង្គអាចផ្សាយនូវព្រះតេជះឲ្យទូលំទូលាយទៅបាន រហូតគ្រប់ទិសទាំងពួងហើយទ្រង់ក៏បានដល់ព្រមដោយរាជសម្បត្តិ តាមព្រះរាជហឫទ័យ។ គ្រប់គ្នា បើនឹងប្រៀបថាខ្លួនឯងជាស្ដេចចក្រពត្តិក៏រមែងប្រព្រឹត្តទៅបានទាំងអស់គ្នា ព្រោះមានរតនៈដ៏វិសេសប្រចាំខ្លួនទាំង ៧ មុខ ដែលមានអត្ថន័យដូចតទៅៈ ១- ឥរិយាបទទាំង ៤ របស់មនុស្សយើង អាចប្រព្រឹត្តទៅបានក្នុងកិច្ចការងារ នេះចាត់ទុកជាចក្ករតនៈ។ ២- ជើងស្ដាំចាត់ទុកជាហត្ថិរតនៈ។ ៣- ជើងឆ្វេងចាត់ទុកជាអស្សរតនៈ។ ជើងទាំងពីរជាអវយវៈនាំរាងកាយទៅក្នុងទីផ្សេងៗតាមប្រាថ្នា។ ៤- កែវភ្នែកទាំងគូ ចាត់ទុកជាកែវមណីរតនៈ ព្រោះអាចមើលអ្វីៗទាំងពួងឃើញ តាមដែលនិយាយថាភ្នែកភ្លឺ។ ៥- សកលកាយ ចាត់ទុកជាឥត្ថីរតនៈ ព្រោះជាទីស្រឡាញ់ ជាទីឱបក្រសោប ថែរក្សាស្លៀកពាក់ប្រដាប់ដោយអាភរណៈផ្សេងៗ។ ៦- ដៃទាំងពីរ ចាត់ទុកជាគហបតិរតនៈ ព្រោះត្រូវធ្វើការងារដើម្បីបានទ្រព្យសម្បត្តិ។ ៧- មាត់និងអណ្ដាត ចាត់ទុកជាបរិនាយករតនៈដ៏វិសេសដោយប្រការដូច្នេះឯង។ គ្រប់គ្នាគួររីករាយចិត្ត ព្រោះថាខ្លួនយើងមានរតនៈដ៏វិសេស ដូចជាសម្បត្តិរបស់ស្ដេចចក្រពត្តិជាស្រេចហើយទើបគួរព្យាយាមប្រើរតនៈដែលមាន ដើម្បីរក្សា និងពង្រីកនូវនគរកាយរបស់ខ្លួនឯង ដែលមានអាណាខេត្តកំណត់ត្រឹមទទឹង ១ ហត្ថ បណ្ដោយ ១ ព្យាម និងកម្រាស់ ១ ចំអាម ឲ្យរុងរឿង និងសុខសប្បាយ។ ក្នុងសេចក្ដីនេះ គឺយើងមិនត្រូវប្រើរបស់ល្អដែលមានក្នុងខ្លួនទៅក្នុងផ្លូវខុស ឬអំពើថោកទាបផ្សេងៗឡើយត្រូវផ្សាយតេជានុភាព បង្ក្រាបសត្រូវនៅក្នុងខ្លួនដោយការប្រព្រឹត្តធម៌។ ស្ដេចចក្រពត្តិប្រព្រឹត្តធម៌ ទើបដល់ព្រមដោយរតនៈ ៧ ប្រការ យ៉ាងណា មនុស្សយើងលុះត្រាតែប្រព្រឹត្តធម៌ទើបសកលកាយនិងអវយវៈផ្សេងៗ សម្រេចបានជារតនៈដ៏វិសេសនាំមកនូវជ័យជម្នះដ៏ក្រៃលែងទៅបាន។ ដកស្រង់ចេញពីសៀវភៅ ពន្លឺធម៌ព្រះពុទ្ធ ដោយ៥០០០ឆ្នាំ |
