ព្រះសុមង្គលសីលាចារ្យ ទិត-ទឹម ព្រះរាជាគណៈពិសេសសម្រាប់ចត្វា  ព្រះមេគណខេត្តសៀមរាប

ព្រះសុមង្គលសីលាចារ្យ ទិត-ទឹម ព្រះរាជាគណៈពិសេសសម្រាប់ចត្វា ព្រះមេគណខេត្តសៀមរាប និងជាព្រះចៅអធិការវត្តដំណាក់

សម្ភព :  នៅថ្ងៃអាទិត្យ ១១កើត ខែស្រាពណ៍ ឆ្នាំឆ្លូវ ព.ស.២៤៣២ គ.ស.១៨៨៨   នៅភូមិគោកត្រាច ឃុំខ្នាត ស្រុកពួក ខេត្តសៀមរាប ។

ព្រះតេជព្រះគុណ ទិត-ទឹម លោកបានទទួលការសិក្សាព្រះត្រៃបិដកមុនដំបូងបង្អស់នៅសាលាព្រះរាជដំណាក់មុខនាគអង្គរវត្ត ខេត្តសៀមរាប ក្នុងសំណាក់ព្រះពុទ្ធវង្ស ព្រះនាម ម៉ី ជាធម្មាចារ្យបង្រៀន។ 
ឆ្នាំ១៩២៦ បានទទួលតំណែងជា ព្រះបាឡាត់គណ ខេត្តសៀមរាប
ឆ្នាំ១៩៣១ បានទទួលតំណែងជា ព្រះមេគណ ខេត្តសៀមរាប មានងារជា “ព្រះសុមង្គលសីលាចារ្យ”



ព្រះតេជព្រះគុណ ព្រះមេគណរូបនេះ លោកបានធ្វើសេចក្ដីចម្រើនឱ្យកើតមានឡើងក្នុងខេត្តសៀមរាបនេះ ទាំងផ្លូវពុទ្ធចក្រនិងអាណាចក្រគួរឱ្យសរសើរ។ ដោយហេតុដែលលោកបានចំណាយកម្លាំងកាយវាចា និងកម្លាំងចិត្តរបស់លោកបម្រើឱ្យប្រយោជន៍ជាតិនិងសាសនាដោយគ្មានសំចៃកម្លាំងនេះហើយ បានជាសរីរៈកាយរបស់លោក ក៏ត្រូវដល់នូវការទ្រុឌទ្រោមគ្រាំគ្រា និងជរាព្យាធិក៏ចេះតែកើតមានជាលំដាប់នៅដើមឆ្នាំ ព.ស.២៥០០ រោគមហារីក ក៏បានចាប់កំណើតក្នុងបំពង់កលោក ដែលបណ្ដាលឱ្យទៅជាជំងឺមួយមានទម្ងន់ធ្ងន់ គួរឱ្យតក់ស្លុតជាទីបំផុត និងបានវះកាត់ព្យាបាលជាសះស្បើយចាករោគនេះ ប៉ុន្តែបែរជាមានវិបត្តិសទ្ទសញ្ញា មានថេរដីកាមិនឮ…។

អនិច្ចធម្ម  :  នៅថ្ងៃអាទិត្យ ១២រោច ខែបឋមាសាឍ ឆ្នាំឆ្លូវ ត្រីស័ក ព.ស.២៥០៤ ត្រូវ​នឹងថ្ងៃទី៩  ខែកក្កដា គ.ស.១៩៦១ វេលាម៉ោង ១៤ ក្នុងជន្មាយុគម្រប់ ៧៣ឆ្នាំ ដោយរោគាពាធ។

សូមឧទ្ទិសមហាកុសលប្រគេនចំពោះ ព្រះវិញ្ញាណក្ខន្ធ ព្រះសុមង្គលសីលាចារ្យ  សូមព្រះតេជព្រះគុណ បានទៅកាន់សុគតិភពជាភិយ្យោភាព!
ភិក្ខុអាយុវឌ្ឍនោ ស្រឿន អូន

ប្រភពៈ ហ្វេសប៊ុក អាយុវឌ្ឍន / Āyuvaḍḍhana
ដោយ៥០០០ឆ្នាំ