រឿងជ្រូកឈ្មោះតច្ឆកៈ

ស្តាប់សំឡេង

រឿងជ្រូកឈ្មោះតច្ឆកៈ
( ចាក ត. ប. )
( ចេះស្តាប់បង្គាប់នាយជន អាចញុំាងប្រយោជន៍ឲ្យសម្រេចបាន )

កាលកន្លងទៅហើយ ក្នុងក្រុងពារាណសី មានជាងឈើម្នាក់ ចូលទៅកាប់ឈើក្នុងព្រៃ បានឃើញជ្រូកព្រៃតូចមួយធ្លាក់អណ្តូង ក៏រើសយកមកចិញ្ចឹមឲ្យឈ្មោះថា តច្ឆកៈ ដល់ជ្រូកនោះធំឡើង ចេះជួយធ្វើការជាងឈើនោះតាមសមត្ថភាព របស់ខ្លួន មានឈ្មុសត្រឡប់ឈើជាដើម ។

ជាងឈើនោះស្រឡាញ់ដូចកូនបង្កើត ទើបគិតថា ទុកជ្រូកឲ្យនៅជាមួយ ថ្ងៃក្រោយក្រែងគេសម្លាប់ ក៏យកទៅលែងក្នុងព្រៃ ។ ជ្រូកតច្ឆកៈគិតថា នៅម្នាក់ឯងមិនកើត ត្រូវរកគ្នីគ្នាច្រើនទើបស្រួល គិតហើយក៏ដើរចូលទៅក្នុងព្រៃ បានឃើញហ្វូងជ្រូកជាច្រើនទើបនិយាយថា យើងកំពុងដើររកញាតិតាមព្រៃភ្នំគ្រាន់បានពឹងពាក់គ្នា ឥឡូវបានជួបដូចបំណងហើយ យើងនាំគ្នានៅក្នុងទីនេះសប្បាយណាស់ ព្រោះមានផ្លែឈើ មើមឈើ ទឹក ព្រៃភ្នំ គួរជាទីរីករាយក្រៃពេក ។

ជ្រូកទាំងឡាយឆ្លើយតបវិញថាៈ ម្នាលតច្ឆកៈ ចូរស្វែងរកទីលំនៅដទៃវិញ ត្បិតទីនេះមានសត្រូវបៀតបៀន សម្លាប់ជ្រូកតូចធំជារឿយៗ ។ ជ្រូកតច្ឆកៈសួរថាៈ អ្នកណាជាសត្រូវ ហ៊ានមើលងាយពួកយើង ដែលស្រុះស្រួលគ្នា ! មើលងាយញាំញីមិនបានទេ ! ចូរអ្នកប្រាប់ខ្ញុំ ។

ជ្រូកទាំងឡាយប្រាប់ថាៈ បពិត្រលោកតច្ឆកៈ មានស្តេចខ្លាមួយ ខ្លាំងពូកែ មានចង្កូម និងក្រចកជាអាវុធ តែងខាំស៊ីជ្រូកតូចៗជារឿយៗ ។

ជ្រូកតច្ឆកៈនិយាយថាៈ ពួកយើងគ្មានចង្កូមទេ ប៉ុន្តែមានកម្លាំងកាយ ឲ្យតែយើងស្រុះស្រួលចេះស្តាប់បង្គាប់គ្នា សាមគ្គីគ្នា យើងនឹងចាប់សម្លាប់វាបានងាយ ។

ជ្រូកទាំងឡាយស្តាប់ហើយ ត្រេកអររីករាយគ្រប់គ្នា និយាយប្រាប់ជ្រូកតច្ឆកៈថា៖ ពាក្យដែលលោកនិយាយហើយនោះ ចំជាពិរោះចាប់ត្រចៀកត្រូវចិត្តយើងខ្ញុំ យើងត្រូវតែតស៊ូប្រយុទ្ធសម្លាប់វាឲ្យបាន ។

ជ្រូកតច្ឆកៈថា បើដូច្នោះឯងត្រូវព្រមព្រៀងគ្នាតាមបង្គាប់អញ ជ្រូកទាំងអស់ព្រមតាម ទើបជ្រូកតច្ឆកៈសួរថា ខ្លាតែងមកចាំស៊ីត្រង់ណា ? ជ្រូកទាំងឡាយប្រាប់ឲ្យដឹងទីកន្លែងសព្វគ្រប់ហើយ ទើបបង្គាប់ឲ្យជ្រូកធំៗ ឈ្មុសរណ្តៅយ៉ាងជ្រៅសម្រាប់បញ្ឆោតខ្លា ហើយឲ្យនាំគ្នាបរិភោគអាហារពីយប់ឲ្យឆ្អែតស្រេច ឲ្យជ្រូកចាស់ៗ ជរា និងកូនជ្រូកតូចៗ នៅកណ្តាល រើសជ្រូកធំៗ មានខ្នាយស្រួចវែងៗ ព័ទ្ធដំកង់ជុំវិញជាជួរៗ ហើយប្រាប់ថា បើខ្លាវាមក ធ្វើដូចម្តេចយើងធ្វើតាមវាកុំភ័យខ្លាច ឯជ្រូកតច្ឆកៈក៏ឈរនៅមុខជាមួយពួកជ្រូកត្រោសៗ ធ្វើជាមេទ័ពឲ្យជ្រូកទាំងនោះធ្វើតាម ។

ដល់ថ្ងៃរះឡើង ខ្លាក៏ចេញពីលំនៅជដិលកោងម្នាក់ដែលវាតែងចែកសាច់ជ្រូកឲ្យស៊ី មកដល់ឃើញជ្រូកឈរដំកង់មីរដេរដាស មានជួរស្រទាប់ដូច្នោះ ក៏ធ្វើជាក្រាបងើបបំរុងលោតចាប់ល្បងមើល ស្រាប់តែឃើញពួកជ្រូកធ្វើដូច្នោះដែរ ក៏ភ័យភិតរត់ទៅកាន់សំណាក់ជដិលកោងវិញទៅ ជដិលកោងឃើញខ្លាមិនពាំជ្រូកទៅដូចថ្ងៃមុន ក៏និយាយដៀមដាមឲ្យថា៖

នែអ្នកខ្លាហាន ថ្ងៃនេះប្រហែលជាអ្នកវៀរចាកបាណាតិបាត ឲ្យអភ័យដល់សត្វទាំងឡាយហើយ ឬក៏ចង្កូមអ្នកបាក់អស់មិនមានសល់ទេ បានជាទៅដល់ហ្វូងជ្រូកហើយត្រឡប់មកធ្វើមុខក្រៀមដូច្នេះ ។ ខ្លាឆ្លើយតបវិញថា៖

មិនមែនដូច្នេះទេ កម្លាំងចង្កូមខ្ញុំមានព្រម ប៉ុន្តែខ្ញុំឃើញពួកជ្រូកសាមគ្គីរួបរួមគ្នា នៅដុំមួយកន្លែង ឃើញខ្ញុំទៅមិនភ្ញាក់ផ្អើលរត់ដូចពេលមុនៗ សោះវាគឺប្រុងបៀតបៀនខ្ញុំវិញ តើខ្ញុំម្នាក់ឯងគ្មានគ្នាពឹងឲ្យចូលទៅខាំស៊ីគេម្តេចបាន ! ជដិលកោងបានស្តាប់ នឹកអស់សង្ឃឹមនឹងបានស៊ីសាច់ជ្រូកទៀត ទើបខំនិយាយបញ្ជោរខ្លាថា៖

ម្នាលស្តេចខ្លា អ្នកមិនដឹងអំណាចឫទ្ធីរបស់អ្នកទេឬ ? អ្នកកុំញញើតឡើយ គ្រាន់តែស្រែកគំរាមហើយរត់ទៅ តម្រង់ទៅ ជ្រូកទាំងនោះនៅរួបរួមគ្នាមិនបានឡើយ ។

ខ្លាឡើងជោរតាមជជិលកោង ក៏ទៅម្តងទៀត ជ្រូកបានឃើញហើយនាំគ្នាប្រុង ខ្លាបោលតម្រង់ចំជ្រូកតច្ឆកៈដែលឈរមុចគេ ក្បែររណ្តៅបញ្ឆោត ជ្រូកតច្ឆកៈគេចភ្លែតចេញ ខ្លាក៏ធ្លាក់សំយុងកទៅរណ្តៅយ៉ាងជ្រៅនោះ ជ្រូកតច្ឆកៈលោតទៅបុកនឹងខ្នាយចំឆ្អឹងចំនី ធ្លុះដល់ថ្លើមប្រកាច់ស្លាប់ក្នុងរណ្តៅនោះស្លាប់មួយរំពេច ទើបខំទាញអូសមកលើរណ្តៅ ចែកជ្រូកទាំងឡាយស៊ី ១ ម៉ាត់ម្នាក់អស់ទៅ ។

ឯជ្រូកដែលមិនបានស៊ី ប្រាប់ជ្រូកតច្ឆកៈថា នៅនាយខ្លា គឺជដិលកោងមួយទៀត ។ ជ្រូកតច្ឆកៈថាបើដូច្នេះ យើងនាំគ្នាទៅសម្លាប់ចោលចេញ ក៏នាំគ្នារត់យ៉ាងលឿនទៅ ។ ចំណែកជដិលកោងកំពុងឈរលេបទឹកមាត់ ចាំខ្លាត្រង់ដើមផ្លូវ ស្រាប់តែឃើញជ្រូកទាំងឡាយរត់តាមផ្លូវមក ក៏ភ័យជាខ្លាំង នឹកថាខ្លាស្លាប់ហើយ ឥឡូវវាមកសម្លាប់អញទៀត ក៏រត់ឡើងដើមឈើមួយធំអាក្រាតសំពត់អស់ ។

ជ្រូកទាំងឡាយប្រាប់តច្ឆកៈជានាយខ្លួនថា នេះឯងជដិលកោងក៏នាំគ្នាឈ្មុសគល់ឈើនោះ យកខ្នាយចាក់គាស់បណ្តាច់ឫសរលំធ្លាក់ជដិលកោងដល់ដីភ្លាម ជ្រូកទាំងឡាយក៏ខាំក្រញីស៊ីអស់ទៅ ។ រុក្ខទេវតាបានឃើញអស្ចារ្យដូច្នោះស្រែកបន្លឺថា ៖

សាធុ សម្ពហុលា ញាតិ អបិ រុក្ខា អរញ្ញវា
សូករេហិ សមគ្គេហិ ព្យគ្ឃោ ឯកាយនេ ហតោ ។

សេចក្តីថា ញាតិទាំងឡាយច្រើន អាចញុំាងប្រយោជន៍ឲ្យសម្រេចដូចជាឈើដែលដុះច្រើន នៅក្នុងព្រៃ ខ្លានិងជដិល គឺជ្រូកដែលស្រុះគ្នាសម្លាប់តែមួយភ្លែតហើយស្រេច ។

ជ្រូកទាំងឡាយ កាលបើសម្លាប់សត្រូវបានអស់ហើយ ក៏សប្បាយរីករាយ ។ អភិសេកជ្រូកតច្ឆកៈធ្វើជានាយខ្លួនតទៅ ។

ដកស្រង់ចេញពីសៀវភៅប្រជុំនិទានជាតក

ដោយ៥០០០ឆ្នាំ

Array
(
    [data] => Array
        (
            [0] => Array
                (
                    [shortcode_id] => 1
                    [shortcode] => [ADS1]
                    [full_code] => 
                )

            [1] => Array
                (
                    [shortcode_id] => 2
                    [shortcode] => [ADS2]
                    [full_code] => c
                )

        )

)

រឿង​ជ្រូក​ឈ្មោះ​តច្ឆកៈ

រឿងជ្រូកឈ្មោះតច្ឆកៈ