អានអត្ថបទ
ផ្សាយ : ២៧ កក្តដា ឆ្នាំ២០១៩ (អាន: ១៣,៧១៣ ដង)
រឿងនាងកាញ្ចនទេវី
|
|
|
រឿងនាងកាញ្ចនទេវី
(ចាក ម វា) (គុណនៃការបូជាបាត្រ ព្រះសម្ពុទ្ធនិងអានិសង្សស្តាប់ទេសនា) កាលព្រះសម្ពុទ្ធបរមគ្រូបរិនិព្វានហើយ ពួកពុទ្ធបរិស័ទទាំងឡាយក្នុងទេវបុត្តនគរនាំគ្នាយកបាត្រព្រះសម្ពុទ្ធទៅបញ្ចុះក្នុងចេតិយកែវមុនបញ្ចុះក្នុងចេតិយនោះ ព្រះរាជាបានចាត់ចែងធ្វើក្បួនហែយ៉ាងអស្ចារ្យ គឺឲ្យរាជបុរសហៅជាងទងជាច្រើនរូបមក ឲ្យយកដើមឬស្សី១ ដើមយ៉ាងធំមករចនាស្រោបមាសរំលេចដោយកែវ ៧ ប្រការ យកបាត្រដាក់ភ្ជាប់លើចុងឬស្សី ហើយលើកឡើងដម្កល់លើរាជរថមាស ហែប្រទក្សិនទីក្រុងបីជុំ ទើបនាំចូលទៅបញ្ចុះក្នុងចេតិយកែវ ប្រជុំគ្នាធ្វើបុណ្យសម្ភោធិ៍ឆ្លងអស់វារៈ ៧ ថ្ងៃ មានធម្មកថិកសំដែងធម៌ទេសនារាល់រាត្រី។
ពួកមនុស្សនិងទេវតា នាគគ្រុឌជាច្រើនបាននាំគ្នាទៅស្តាប់ធម៌ទេសនា។ កាលនោះមាននាគរាជមួយមានឬទ្ធិអស្ចារ្យបានមកស្តាប់ធម៌ដែរ បានឃើញនារីម្នាក់មានរូបល្អស្រស់ប្រិមប្រិយ ជាស្រីមានសទ្ធាមាំក្នុងព្រះពុទ្ធសាសនា។ នាគរាជមានសេចក្តីស្នេហា និម្មិតជាមាណពទៅនិយាយលួងលោមនាង យកនាងជាភរិយា នាងមិនព្រម ក៏មានសេចក្តីក្រោធខឹងនិម្មិតខ្លួនជាពស់នាគយ៉ាងធំ រុំព័ទ្ធនាងនោះជិតតំាងពីបាតជើងឡើងទៅ ហើយបើកពពារគ្របបិទពីលើ បំណងឲ្យនាងស្លាប់ ប៉ុន្តែនាងតំាងចិត្តយ៉ាងមាំក្នុងការគោរពព្រះចេតិយ និងព្រះធម៌ទេសនាតែម្យ៉ាងឥតរំភើបញាប់ញ័រអ្វីឡើយ មិនយូរប៉ុន្មាននាគរាជក្តៅក្រហាយរលាយភ្នែនស្ទុះចេញឆ្ងាយពីនាង នឹកស្ងើចអស្ចារ្យ កើតសេចក្តីជ្រះថ្លាចំពោះនាង ទើបនិម្មិតខ្លួនមានពពា១ រយឲ្យនាងអង្គុយពីលើក្នុងទីកណ្តាលហ្វូងពុទ្ធបរិស័ទ ហើយបូជាដោយកហាបណៈជាច្រើនពាន់។ ចំណែកពុទ្ធបរិស័ទទាំងឡាយឃើញហេតុអស្ចារ្យដូច្នោះហើយ កើតសេចក្តីជ្រះថ្លានំាគ្នាយកកហាបណៈទៅបូជានាង រួមទាំងអស់ ១៨ កោធិ។ នាងបានសម្បត្តិច្រើនដូច្នេះហើយខំធ្វើទានសីលដរាបដល់អស់អាយុ ក៏ទៅចាប់កំណើតក្នុងផ្ទៃអគ្គមហេសីនៃព្រះមហាក្សត្រក្នុងនគរនោះឯង ដល់ពេលដែលប្រសូត្រមានហេតុអស្ចារ្យភ្លៀងកែវ ៧ ប្រការធ្លាក់ចុះមកពេញទេវបុត្តនគរទាំងមូលទើបព្រះបរមរាជវង្សានុវង្សថ្វាយព្រះនាមថា កាញ្ចនទេវី។ ឯនាងកាញ្ចនទេវីនេះ មានរូបល្អស្រស់ដូចជារូបស្រីទេពអប្សរ មានពន្លឺផ្សាយចេញពីកាយប្រវែងមួយហត្ថ ជានិច្ចដោយអានិសង្សដែលនាងបូជាបាត្រព្រះសម្ពុទ្ធ និងអានិសង្សស្តាប់ធម៌ទេសនា។ សេ្តចក្នុងជម្ពូទ្វីបទំាងមូលនាំគ្នាបញ្ជូនគ្រឿងបណ្ណាការមកថ្វាយព្រះរាជបិតា ដើម្បីដណ្តឹងនាងៗ មិនព្រមយក ព្រោះជាស្រ្តីមាននិស្ស័យខ្ពស់ នាងសូមអង្វរព្រះរាជបិតា សូមចេញចាកព្រះរាជនិវេសន៍ទៅបួសក្នុងសំណាក់ភិក្ខុនី ព្រះរាជបិតាទ្រង់ព្រះរាជាអនុញ្ញាតតាមសូម ទើបដង្ហែនាងចេញពីព្រះរាជនិវេសន៍យ៉ាងមហាឡារឹកអស្ចារ្យទៅបួសជាភិក្ខុនី មិនយូរប៉ុន្មាន នាងបានសម្រេចអរហត្តផល ព្រមទាំងបដិសម្ភិទា មាននាមប្រាកដថា កាញ្ចនថេរី ដល់អស់អាយុក៏បរិនិញ្វនទៅ។ ដោយ៥០០០ឆ្នាំ |
