អានអត្ថបទ
ផ្សាយ : ១៤ មករា ឆ្នាំ២០២៣ (អាន: ២៨,០៦៨ ដង)
បែបអ្នករក្សាសីល ១០
|
|
|
បែបអ្នករក្សាសីល ១០
ឧបាសក ឧបាសិកា អ្នករក្សាសីល ១០ ត្រូវកោរសក់ បើមានពុកមាត់ ពុងចង្កា ក៏ត្រូវកោរផងដែរ ត្រូវកាត់ក្រចកដៃ-ជើងឲ្យស្មើនឹងសាច់ត្រូវស្លៀកពាក់ស ឬពានាសំពត់សផងក៏បានតាមគួរដល់ការលៃលកឲ្យសមរម្យតាមសុភាពបុរស និងស្ត្រី។ សីលកើតមានឡើងដោយសារវិរតិចេតនា ពុំមែនដោយសារកោរសក់ ស្លៀកពាក់សទេក៏ពិតមែនហើយ ប៉ុន្តែការកោរសក់ស្លៀកពាក់សនេះ ជាប្រវេណីមួយសម្រាប់គ្រហស្ថអ្នករក្សាសីល ១០ ក្នុងព្រះពុទ្ធសាសនា ជាគ្រឿងសម្គាល់ឲ្យឃើញប្លែកពីគ្រហស្ថទាំងពួង ទាំងជាភ័ស្ដុតាងដល់ផ្លូវចិត្តរបស់គ្រហស្ថអ្នកកាន់សីល ១០ នោះផងទៀត។ ប៉ុន្តែកុំយល់ថាដូចគ្នា នឹងអ្នកដែលស្លៀកពាក់សតាមធម្មតា ឬអ្នកដែលកោរសក់ កោរពុកមាត់ ពុងចង្កាតាមធម្មតាឥតបានសមាទានកាន់សីលសោះនោះឡើយ។ អ្នកកាន់សីល និងអ្នកមិនកាន់សីលមានសភាពផ្សេងផ្ទុយគ្នាដោយផ្លូវចិត្ត ដោយចរិយានិងគុណសម្បត្តិ សូម្បីអ្នកកាន់សីលផងគ្នាក៏គង់ផ្សេងទីទៃពីគ្នាដោយថ្នាក់សីលដែរ គឺភិក្ខុ មានសីលខ្ពស់ជាងសាមណេរ សាមណេរមានសីលខ្ពស់ជាង គ្រហស្ថអ្នកកាន់សីល ១០ គ្រហស្ថអ្នកកាន់សីល ១០ មានថ្នាក់ខ្ពស់ជាងអ្នកកាន់សីល ៨ អ្នកកាន់សីល ៨ មានថ្នាក់ខ្ពស់ជាងអ្នកកាន់សីល ៥។ អ្នកកាន់សីលទាំងនេះ សុទ្ធតែគោរពគ្នាតាមលំដាប់ថ្នាក់សីល ទាំងតាមលំដាប់ថ្នាក់អាយុវស្សាចាស់ ក្មេង ហើយនឹងគុណសម្បត្តិទៀតផង ទើបសមគួរតាមលំអានគន្លងគារវធម៌ក្នុងព្រះពុទ្ធសាសនា និងបោរាណកធម៌ក្នុងកាលព្រេងនាយសូម្បីសត្វតិរច្ឆានធំ តូចដូចយ៉ាងសត្វទទា ស្វា ដំរី ដែលចេះគោរពគ្នាតាម អាយុ ចាស់ ក្មេង ក៏អាចបានសុគតិភពជាទិដ្ឋាននុគតិ ឲ្យមនុស្សយកតម្រាប់បានដែរ។ ដកស្រង់ចេញពីសៀវភៅ ប្រជុំត្រ័យរ័ត្ន រៀបរៀងដោយ ឆាយ ការ៉ាណូ ដោយ៥០០០ឆ្នាំ |
