អានអត្ថបទ
ផ្សាយ : ០៤ ឧសភា ឆ្នាំ២០២១ (អាន: ៤០,៥០៤ ដង)
សតិប្បដ្ឋានមាន ៤
|
|
|
សតិប្បដ្ឋានមាន ៤
១- កាយានុបស្សនាសតិប្បដ្ឋាន ការតម្កល់ស្មារតីពិចារណានូវកាយ។ ២- វេទនានុបស្សនាសតិប្បដ្ឋាន ការតម្កល់ស្មារតី ពិចារណានូវវេទនា។ ៣- ចិត្តានុបស្សនាសតិប្បដ្ឋាន ការតម្កល់ស្មារតីពិចារណានូវចិត្ត។ ៤- ធម្មានុបស្សនាសតិប្បដ្ឋាន ការតម្កល់ស្មារតីពិចារណានូវធម៌។ នៅក្នុងសម្មោហវិនោទនីអដ្ឋកថា សតិប្បដ្ឋានវិភង្គលោកមានការសម្ដែងជាសំនួរ សួរថា ព្រោះហេតុអ្វី ទើបព្រះដ៏មានព្រះភាគជាម្ចាស់ត្រាស់សតិប្បដ្ឋានទុក ៤ ប៉ុណ្ណោះ ដោយមិនខ្វះមិនលើស? ឆ្លើយថា ព្រោះដើម្បីនឹងឲ្យជាប្រយោជន៍ដ៏សមគួរដល់វេនេយ្យសត្វ។ ពិតមែនហើយ សត្វទាំងឡាយណាដែលជាប្រភេទនៃតណ្ហាចរិក និងទិដ្ឋិចរិក ឬ សមយាហនិក និងវិបស្សនាយានិកប្រព្រឹត្តទៅ ២ យ៉ាងដោយអំណាចនៃមន្ទបុគ្គល និងតិក្ខបុគ្គល (គឺទន់ខ្សោយ និងចាស់ក្លា) កាយានុបស្សនាសតិប្បដ្ឋានដែលជាឱឡារិក (គ្រោតគ្រាត) ជាផ្លូវនៃសេចក្ដីបរិសុទ្ធ របស់បុគ្គលអ្នកមានតណ្ហាចរិកយ៉ាងទន់ខ្សោយ។ វេទនានុបស្សនាសតិប្បដ្ឋានដែលសុខុមជាសេចក្ដីបរិសុទ្ធរបស់បុគ្គលអ្នកមានតណ្ហាយ៉ាងចាស់ក្លា។ ចិត្តានុបស្សនាសតិប្បដ្ឋាន ដែលមានអារម្មណ៍ញែកចែកទៅមិនច្រើនពេក ជាផ្លូវនៃសេចក្ដីបរិសុទ្ធរបស់បុគ្គលអ្នកមានទិដ្ឋិចរិកយ៉ាងទន់។ ធម្មានុបស្សនាសតិប្បដ្ឋានដែលមានអារម្មណ៍ញែកចែកជាច្រើន ជាផ្លូវនៃសេចក្ដីបរិសុទ្ធរបស់បុគ្គលអ្នកមានទិដ្ឋិចរិកយ៉ាងចាស់ក្លា។ ម្យ៉ាងវិញទៀត សតិប្បដ្ឋានទី ១ ដែលមាននិមិត្តដែលបុគ្គលគប្បីសម្រេចបាន ដោយមិនលំបាកជាផ្លូវនៃសេចក្ដីបរិសុទ្ធរបស់បុគ្គល ជាអ្នកសមថយានិកយ៉ាងទន់ សតិប្បដ្ឋានទី ២ ជាផ្លូវនៃសេចក្ដីបរិសុទ្ធរបស់បុគ្គលអ្នកសមថយានិកយ៉ាងចាស់ក្លា ព្រោះមិនកើតក្នុងអារម្មណ៍ដែលគ្រោតគ្រាត។ សតិប្បដ្ឋានទី ៣ មានអារម្មណ៍ដែលញែកចេញមិនច្រើនពេក ជាផ្លូវនៃសេចក្ដីបរិសុទ្ធរបស់បុគ្គលអ្នកជាវិបស្សនាយានិកយ៉ាងទន់។ សតិប្បដ្ឋានទី ៤ មានអារម្មណ៍ដែលញែកចេញច្រើនក្រៃលែង ជាផ្លូវនៃសេចក្ដីបរិសុទ្ធ របស់បុគ្គលអ្នកជាវិបស្សនាយានិកយ៉ាងចាស់ក្លា។ ព្រោះហេតុនោះព្រះមានព្រះភាគជាម្ចាស់ត្រាស់សតិបដ្ឋានទុក ៤ ដោយមិនខ្វះមិនលើសដោយប្រការដូច្នេះឯង។ សតិប្បដ្ឋានទាំង ៤ នេះព្រះសម្មាសម្ពុទ្ធ ព្រះអង្គទ្រង់សម្ដែងចែកចេញជា ១១ បព្វៈ ប្រែថា វគ្គ ឃ្លា ថ្នាក់ សន្លាក់សង្កាត់ ទៅតាមពាក្យលំនាំសេចក្ដីនៃព្រះធម៌។
ដកស្រង់ចេញពីសៀវភៅ ជំនួយសុខភាពផ្លូលចិត្ត១ រៀបរៀងដោយ សាមណេរ ចាន់ សុជន ដោយ៥០០០ឆ្នាំ |
អត្ថបទអ្នកអាចអានបន្ត
