អានអត្ថបទ
ផ្សាយ : ១៦ តុលា ឆ្នាំ២០២១ (អាន: ១៤,៦១៩ ដង)
ពុទ្ធក្ខេត្តមាន៣យ៉ាង
|
|
|
ពុទ្ធក្ខេត្តមាន៣យ៉ាង
១- ជាតិក្ខេត្ត មានលោកធាតុឬចក្កវាឡចំនួនមួយម៉ឺន (១០.០០០លោកធាតុ) ក្នុងពេលដែលព្រះសម្ពុទ្ធចុះចាប់បដិសន្ធិនិងប្រសូតជាដើម លោកធាតុឬចក្កវាឡទាំងមួយម៉ឺននោះ កម្រើករំពើកញាប់ញ័រទាំងអស់ ហាក់ដូចជាគេចាក់ញាក់ឬចាប់អង្រួនដោយអំណាចបុណ្យរបស់ព្រះអង្គ។ ២- អាណាខេត្ត មានលោកធាតុឬចក្កវាឡចំនួនមួយសែនកោដិ (១០០.០០០ កោដិលោកធាតុ) ក្នុងពេលដែលព្រះសម្ពុទ្ធសម្ដែងនូវរតនបរិត្ត, ខន្ធបរិត្ត, ធជគ្គបរិត្ត, អាដានាដិយបរិត្តនិងមោរបរិត្ត លោកធាតុឬចក្កវាឡទាំងមួយសែនកោដិនោះ កម្រើករំពើកញាប់ញ័រទាំងអស់ ហាក់ដូចជាគេចាប់ញាក់ឬចាប់អង្រួន ដោយអំណាចរបស់ព្រះបរិត្តដែលព្រះអង្គសម្ដែង។ ៣- វិសយក្ខេត្ត មានលោកធាតុឬចក្កវាឡជាអនន្តរាប់មិនបានប្រមាណមិនត្រូវ, អំណាចប្រាជ្ញាញាណរបស់ព្រះសម្ពុទ្ធជ្រៅឆ្ងាយទូលាយជាអនន្ត ផ្សាយទៅក្នុងឱកាសលោកដែលរកទីបំផុតមិនឃើញបានតាមពុទ្ធបំណង បើព្រះអង្គចង់ជ្រាបនូវហេតុជាអនន្តបែបណា ទ្រង់ជ្រាបបានបែបនោះឥតមានទើសទាក់។ ពុទ្ធក្ខេត្តទាំងបីនោះ លើកលែងវិសយក្ខេត្តមួយចេញ ព្រោះជាធម្មតាវិស័យប្រាជ្ញាញាណរបស់ព្រះពុទ្ធគ្រប់ព្រះអង្គ។ ចំណែកខាងជាតិក្ខេត្តនិងអាណាខេត្ត ដែលមានលោកធាតុឬចក្កវាឡមួយសែនកោដិនោះ ជាខេត្តរបស់ព្រះសម្ពុទ្ធមួយអង្គៗ។ លោកធាតុឬចក្កវាឡទាំងមួយសែនកោដិនោះ សង្ខារលលោកតាក់តែងឡើងក្នុងពេលជាមួយគ្នា មានអាយុស្ថិតនៅប្រហែលគ្នា វិនាសទៅវិញក៏តំណាលគ្នា ដូចមានសម្ដែងក្នុងគម្ពីរវិសុទ្ធិមគ្គ ត្រង់អភិញ្ញានិទ្ទេសថាៈ ឯវមេតេសុ តីសុ ពុទ្ធក្ខេត្តេសុ ឯកំ អាណាខេត្តំ វិនស្សតិ។ តស្មឹ បន វិនស្សន្តេ ជាតិក្ខេត្តម្បិ វិនដ្ឋមេវ ហោតិ។ វិនស្សន្តញ្ច ឯកតោវ វិនស្សន្តិ។ សណ្ឋហន្តម្បី ឯកតោវ សណ្ឋហតិ។ តស្សេវំ វិនាសោ ច សណ្ឋហនញ្ច វេទិតព្វំ។ សេចក្ដីថាៈ បណ្ដាពុទ្ធក្ខេត្តទាំងបីនោះ អាណាខេត្តមួយត្រូវវិនាស កាលបើអាណាខេត្តវិនាសហើយ ចំណែកខាងជាតិក្ខេត្ត ក៏ត្រូវវិនាសដូចគ្នា។ ជាតិក្ខេត្តកាលវិនាសក៏វិនាសក្នុងពេលជាមួយគ្នានឹងអាណាខេត្ត, កាលតាំងនៅក៏តាំងនៅក្នុងពេលជាមួយគ្នានឹងអាណាខេត្ត។ ការវិនាសក្ដី តាំងនៅក្ដីនៃជាតិក្ខេត្តនិងអាណាខេត្តនោះ បណ្ឌិតត្រូវជ្រាបយ៉ាងនេះចុះ។ ន័យត្រង់ពុទ្ធក្ខេត្តនេះ ច្រើនមានយោបល់យល់ផ្សេងៗគ្នា ខ្លះយល់ថា ក្នុងឱកាសលោកទាំងមូល ដែលមានមេឃអាកាសធំទូលាយល្ហល្ហេវនេះ មានលោកធាតុឬចក្កវាឡត្រឹមតែមួយសែនកោដិប៉ុណ្ណោះ យូរៗទើបមានព្រះពុទ្ធត្រាស់មួយអង្គ មិនមានជានិច្ចកាលរាល់ខែរាល់ឆ្នាំទេ ព្រោះមិនមានលោកធាតុឬចក្កវាឡដោយឡែកក្រៅពីមួយសែនកោដិនោះទៀត។ ខ្លះទៀតយល់ថា ក្នុងឱកាសលោកទាំងមូល ដែលមានមេឃអាកាសធំទូលាយល្ហល្ហេវនេះ មិនមែនមានតែលោកធាតុឬចក្កវាឡត្រឹមតែមួយសែនកោដិប៉ុណ្ណោះទេ គឺមាន១សែនកោដិៗជាអនន្តរាប់មិនអស់ មានព្រះពុទ្ធបរិនិព្វានទៅហើយ លោកធាតុមួយសែនកោដិនោះ មានព្រះពុទ្ធកំពុងត្រាស់ដឹង, លោកធាតុមួយសែនកោដិឯណេះ មានព្រះពុទ្ធកំពុងចុះចាប់បដិសន្ធិ លោកធាតុមួយសែនកោដិឯណោះ មានព្រះពុទ្ធកំពុងចេញបព្វជ្ជាឬមានលោកធាតុមួយសែនកោដិៗជាច្រើន ដែលមានព្រះពុទ្ធកំពុងចុះចាប់បដិសន្ធិ កំពុងតែប្រសូត កំពុងតែបានត្រាស់ជាដើមក៏មានលោកធាតុមួយសែនកោដិជាច្រើនកំពុងតែវិនាស មានលោកធាតុមួយសែនកោដិជាច្រើន ដែលកំពុងតែចម្រើន។ ការយល់ដឹងពីរស្ថាននេះ អ្នករៀបរៀងមិនបាច់វិនិច្ឆ័យថា ខាងណាខុសខាងណាត្រូវទេ គ្រាន់តែទាញហេតុផលមកបង្ហាញជាគ្រោងគំនិតទុកជាបានការ ស្រេចលើពុទ្ធបរិស័ទដែលបានមើលសៀវភៅនេះវិនិច្ឆ័យចុះ បើឃើញថាខាងណាសមហេតុសមផលជាង ខាងនោះហើយត្រូវពិតប្រាកដ។ ដកស្រង់ចេញពីសៀវភៅ កប្បកថា ដោយ៥០០០ឆ្នាំ |
