អានអត្ថបទ
ផ្សាយ : ២៨ កក្តដា ឆ្នាំ២០១៩ (អាន: ១៨,៧១៦ ដង)
មហាសមុទ្រ
|
|
|
មហាសមុទ្រ
មហាសមុទ្រមិននៅរួមជាមួយនឹងសាកសព បើមានសាកសព រលកតែងនាំមកចោលលើច្រាំង យ៉ាងណាបុគ្គលល្អ រមែងមិននៅជាមួយនឹងកិលេសគ្រឿងសៅហ្មងមានលោភៈ ទោសៈ និងមោហៈ ជាដើមឡើយ ក៏យ៉ាងនោះដែរ។ មហាសមុទ្រ ទ្រទ្រង់រក្សាទុកនូវរតនៈច្រើនប្រការមានកែវមុក្ដា កែវពិទូរ្យ កែវប្រពាល កែវផលិក មាស និងប្រាក់ ។ល។ រមែងរួបរួមទុក មិនឲ្យខ្ចាត់ខ្ចាយរាត់រាយទៅខាងក្រៅឡើយ ដូចជាព្រះអរិយបុគ្គលដែលទ្រទ្រង់នូវរតនៈគឺគុណវិសេសផ្សេងៗ មានសតិប្បដ្ឋាន ៤ ជាដើមរហូតដល់មគ្គផលជាលោកុត្តរ ហើយរក្សាទុកនូវខាងកក្នុងមិនឲ្យផ្សព្វផ្សាយទៅខាងក្រៅដោយអំនួតអួតអាងឡើយ។ មហាសមុទ្រ រមែងជាទីនៃសត្វធំៗ និងអមនុស្សផ្សេងៗ មានពពួកទេវតាជាដើម មានន័យដែលគួរឲ្យសិក្សាត្រង់ថាមនុស្សល្អ រមែងជាទីនៅរួមដោយកល្យាណមិត្តសំខាន់ៗ ជាមិត្តដែលបានទ្រទ្រង់នូវគុណមានការប្រាថ្នាតិច មានសន្ដោស ចេះខ្មាសខ្ពើមបាប និងមាននូវសីលជាទី ស្រលាញ់ជាដើម។ មហាសមុទ្រ តែងមានទឹកថ្មីៗហូរចូលរាល់ថ្ងៃដោយទន្លេតូចធំទាំងឡាយរាប់មិនអស់ ព្រមទាំងទឹកភ្លៀងពីលើធ្លាក់ចុះ សូម្បីដល់ម្លេះក៏មិនបានកន្លងច្រាំងនៃមហាសមុទ្រឡើយ នេះតាមប្រក្រតីធម្មតា យ៉ាងណា សាវ័ករបស់ព្រះសម្មាសម្ពុទ្ធ ជាបុគ្គលប្រាថ្នានូវសេចក្ដីបរិសុទ្ធ ក៏មិនប្រព្រឹត្តកន្លងនូវសិក្ខាបទ ព្រោះហេតុនៃលាភ យស សរសើរ សុខ ឬ ព្រោះហេតុនៃជីវិតនោះឡើយ ក៏យ៉ាងនោះដែរ។ មហាសមុទ្រ មិនចេះពេញទៅដោយទឹកដែលហូរចូលរាល់ថ្ងៃ ក៏មានសេចក្ដីដូចជាបុគ្គលដែលមានជាតិជាបណ្ឌិត រមែងមិនចេះឆ្អែតក្នុងការស្ដាប់នូវព្រះធម៌ដែលជាពាក្យប្រៀនប្រដៅរបស់ព្រះជិនស្រីឡើយ។ ដកស្រង់ចេញពីសៀវភៅ ៤៨ធម្មទស្សន៍ ដោយ៥០០០ឆ្នាំ |
អត្ថបទអ្នកអាចអានបន្ត
