Reading Article
Public date : 26, Jul 2019 (21,523 Read)
មនុស្ស ៤ ពួក
|
|
|
មនុស្សចែកចេញជា ៤ ពួក គឺ៖
១. មនុស្សមនុស្សោ (រូបជាមនុស្ស ចិត្តជាមនុស្ស មានមនុស្សធម៌) ។ ២. មនុស្សទេវោ (រូបជាមនុស្ស ចិត្តជាទេវតា មានសីលធម៌ខ្ពង់ខ្ពស់) ។ ៣. មនុស្សបេតោ (រូបមនុស្ស ចិត្តជាប្រេត) ៤. មនុស្សតិរច្ឆានោ (រូបជាមនុស្ស ចិត្តជាសត្វតិរច្ឆាន) ។ វណ្ណៈណាក៏ដោយ ទោះស្តេចក្តី, នាម៉ឺនមន្រ្តីក្តី, រាស្រ្តសមញ្ញក្តី បើក្នុងបច្ចុប្បន្ននេះប្រព្រឹត្តអាក្រក់ សាងបាបកម្ម កាចសាហាវយង់ឃ្នង នឹងត្រូវចាត់ចូលក្នុងជំពូក មនុស្សបេតោ ឬមនុស្សតិរច្ឆានោ ។ ប៉ុន្តែបើប្រព្រឹត្តល្អ សាងកុសលធម៌ សាងបារមី បំពេញនូវទសពិធរាជធម៌ នឹងត្រូវចាត់ចូលក្នុងជំពូក មនុស្សមនុស្សា ឬមនុស្សទេវោ ។ តាមទ្រឹស្តីពុទ្ធនិយម ផលនៃកម្មក្នុងបច្ចុប្បន្ន នាំមនុស្សទាំងបួនជំពូកនេះ ឲ្យយោនយកកំណើត កើតនៅអនាគតជាតិ ដូចខាងក្រោមនេះ ៖ មនុស្សមនុស្សោ ចាប់ជាតិជាមនុស្ស។ មនុស្សទេវោ ចាប់ជាតិជាទេវតា ។ មនុស្សបេតោ ចាប់ជាតិជាប្រេត ។ មនុស្សតិរច្ឆានោ ចាប់ជាតិជាសត្វតិរច្ឆាន ។ សត្វលោកដឹកនាំដោយ ចិត្ត ។ ចិត្តនេះហើយ ដែលបញ្ជាមនុស្សឲ្យប្រព្រឹត្តអំពើអបាយមុខផ្សេងៗ ។ ចិត្តនេះហើយ ដែលមនុស្សទូន្មានបានដោយកម្រ ។ ការពិត ចិត្តជាធម្មជាតិស្អាតផូរផង់ ពន្លឺត្រចះត្រចង់ពីកំណើត ប៉ុន្តែចិត្តនេះ កាលបើមានឧបក្កិលេសចូលទៅរុំព័ទ្ធ ក៏បណ្តោយឲ្យយើងប្រព្រឹត្តនូវអកុសលកម្មផ្សេងៗ ។ ដូចនេះហើយ បានជាពុទ្ធសាសនិកជន ដែលមានជំនឿមុតមាំលើ កម្មផល នាំគ្នាខំហាត់ពត់លត់ដំចិត្ត ខំជម្រះមន្ទិលសៅហ្មង ខំប្រព្រឹត្តនូវកុសលកម្ម ដើម្បីកសាងខ្លួន ឲ្យបានកើតជាមនុស្ស ឬ ទេវតា នៅអនាគតជាតិ ។ ការអប់រំបន្ទុំចិត្ត ឲ្យបរិសុទ្ធស្រស់ស្អាត ពុទ្ធបរិស័ទធ្វើឡើងតាមរយៈការធ្វើបុណ្យឬបុញ្ញកម្ម ។ ដកស្រង់ចេញពីសៀវភៅ " ទ្រឹស្តីកម្មផល " រៀបរៀងដោយ ឈុន-គឹមអៀក ដោយ៥០០០ឆ្នាំ |
