អ្នកមានសតិស្មារតីវាងវៃ តែងឈ្នះសត្រូវទាំងពួង

Audio

រឿងស្វាពោធិសត្វ
( ចាក វា. ឯ. )
( អ្នកមានសតិស្មារតីវាងវៃ តែងឈ្នះសត្រូវទាំងពួង )

ក្នុងកាលកន្លងទៅហើយ ព្រះបាទព្រហ្មទត្តសោយរាជ្យសម្បត្តិ ក្នុងនគរពារាណសី ។ កាលនោះព្រះពោធិសត្វទ្រង់សោយព្រះជាតិ ជាស្វាមានរូបធំស្រមូវមានកំលាងខ្លាំងដូចដំរីស្ករ បានដើរទៅមាត់ស្ទឹងឃើញកោះមួយ ដែលបរិបូណ៍ដោយរុក្ខជាតិមានផ្លែ ក៏លោតអំពីមាត់ស្ទឹង ទៅជាន់ដុំថ្មមួយកណ្តាលស្ទឹង ហើយលោតអំពីដុំថ្មនោះទៅកោះ បេះផ្លែឈើផ្សេងៗ បរិភោគតាមប្រាថ្នា ដល់វេលាល្ងាចត្រឡប់មកលំនៅរបស់ខ្លួនវិញ ។

ស្វាពោធិសត្វតែងលោតទៅមកយ៉ាងនេះជារាល់ថ្ងៃ ។ ក្នុងស្ទឹងនោះ មានក្រពើញីឈ្មោលមួយគូ ក្រពើញីមានផ្ទៃពោះ បានឃើញព្រះពោធិសត្វ លោតឆ្លងទៅមកដូច្នោះ ក៏កើតចំណង់ចង់ស៊ីថ្លើមពោធិសត្វ ទើបប្រាប់ដល់ប្តីថា ខ្ញុំចង់ស៊ីថ្លើមស្វានោះ ។

ក្រពើឈ្មោល ក៏និយាយថាមិនក្រអ្វីទេ ចាំបងចាប់យកឲ្យល្ងាចនេះ ។ និយាយហើយ ក៏ឡើងទៅដេកទ្រោបលើដុំថ្ម ដែលស្វាពោធិសត្វតែងលោតទៅជាន់ ។ ដល់វេលាល្ងាច ស្វាពោធិសត្វមកវិញ ឈរនៅមាត់កោះ សំឡឹងមើលដុំថ្មដែលធ្លាប់លោត ឃើញខ្ពស់ផុតពីទឹកជាងមុន ទើបរំពឹងថានឹងមានហេតុផលយ៉ាងណាអេះ ទឹកក្នុងស្ទឹងនេះមិនមែនស្រក និងមិនមែនឡើងខុសប្រក្រតីទេ ចុះហេតុអ្វីដុំថ្មនេះខ្ពស់ជាងមុន ប្រហែលជាក្រពើធ្វើបន្លំចាំស៊ីអញហើយ ។

ពោធិសត្វគិតពិសោធន៍ឲ្យដឹងច្បាស់ ទើបហៅដុំថ្មថា ដុំថ្មអើយដុំថ្ម! ហៅយ៉ាងនេះបីដង ទើបនិយាយនឹងដុំថ្មទៀតថា នែដុំថ្មអើយ ថ្ងៃនេះហេតុអ្វីក៏ឆ្មើងមិននិយាយឆ្លងឆ្លើយគ្នាសោះ ។ ឯក្រពើបានឮដូច្នោះគិតថា " ដុំថ្មធ្លាប់និយាយ ឆ្លងឆ្លើយនឹងស្វាពីមុនមក " ក៏ឆ្លើយជំនួសថ្មថា ហៅអញធ្វើអ្វីបងស្វា?

ពោធិសត្វ ស្គាល់ជាក់ថាជាក្រពើទើបសួរថា អ្នកណាឆ្លើយសំឡេងប្លែក? ក្រពើថាអញ ! ស្វាថាចុះអ្នកមកក្រាបលើដុំថ្មនេះធ្វើអ្វី ? ក្រពើថាយើងត្រូវការថ្លើមរបស់អ្នក ទើបមកក្រាបនៅទីនេះ ។

ព្រះពោធិសត្វគិតថាផ្លូវដទៃក្រៅអំពីនេះមិនមាន បើដូច្នេះអញត្រូវលួងចិត្តក្រពើនេះ គិតហើយនិយាយថា បងសំលាញ់ក្រពើ! យើងឲ្យថ្លើមដល់អ្នក ចូរអ្នកហាមាត់ចាំចុះយើងនិងលោតចូលទៅក្នុងមាត់តែម្តង ។

ធម្មតាសត្វក្រពើ កាលបើហាមាត់ហើយតែងបិទភ្នែក ក្រពើក៏ហាមាត់បិទភ្នែកចាំ ។ ព្រះពោធិសត្វ ក៏លោតអំពីកោះទៅជាន់ក្បាលក្រពើ ហើយលោតទៅមាត់ស្ទឹង ក្រពើឃើញដូច្នេះគិតថា ស្វានេះអង់អាចជាបណ្ឌិតបរិបូណ៍ដោយគុណធម៌ ទើបសូត្រពាក្យស្លោកថា:

យស្សេតេ ចតុតេ ធម្មា វានរិន្ទ យថា តវ
សច្ចំ ធម្មោ គីតំ ចាគោ ទិដ្ឋំ សោ អតិវត្តតិ

ប្រែថា បពិត្រស្តេចស្វា ធម៌ទាំងឡាយបួនយ៉ាងនេះ គឺ សច្ច ១ ធម្ម ១ ធិតិ ១ ចាគ ១ មានដល់បុគ្គលណាដែលដូចលោក បុគ្គលនោះតែងបង្រ្កាបនូវខ្មាំងបាន ។

បានដកស្រង់ចេញពីប្រជុំនិទានជាតក
ដោយ៥០០០ឆ្នាំ

Array
(
    [data] => Array
        (
            [0] => Array
                (
                    [shortcode_id] => 1
                    [shortcode] => [ADS1]
                    [full_code] => 
                )

            [1] => Array
                (
                    [shortcode_id] => 2
                    [shortcode] => [ADS2]
                    [full_code] => c
                )

        )

)

អ្នក​មាន​សតិ​ស្មារតី​វាង​វៃ​ តែង​ឈ្នះ​សត្រូវ​ទាំង​ពួង​

អ្នកមានសតិស្មារតីវាងវៃ តែងឈ្នះសត្រូវទាំងពួង