Reading Article
Public date : 27, Jul 2019 (46,039 Read)
រឿងសីលវិមំសកព្រាហ្មណ៏
|
|
|
រឿងសីលវិមំសកព្រាហ្មណ៏
( ចាក ម. អ. ) ( សីលជាប្រធាននៃសេចក្តីរាប់អានក្នុងលោក ) មានព្រាហ្មណ៏ម្នាក់ឈ្មោះវិមំសក នៅក្រុងពារាណសីរស់នៅដោយសារព្រះរាជា ទ្រង់ព្រះនាមកោសល ជាអ្នកដល់នូវត្រៃសរណគមន៍ និងមានសីល ៥ មិនដែលដាច់សោះ ។
ព្រះរាជាស្រឡាញ់រាប់អានព្រាហ្មណ៏ នោះជាងព្រាហ្មណ៏ផ្សេងៗ ដោយគាត់មានសីល ។ ថ្ងៃមួយព្រាហ្មណ៏នោះគិតថាព្រះរាជារាប់អានអញយ៉ាងនេះ ព្រោះអាស្រ័យជាតិ គោត្ត ត្រកូល ប្រទេស សិប្ប សម្បត្តិទេឬ ? ឬក៏ព្រោះអាស្រ័យសីលសម្បត្តិ បើដូច្នោះគួរអញល្បងមើល ។ ដល់ពេលគាត់ទៅបំរើព្រះរាជា លុះត្រឡប់មកផ្ទះវិញក៏យកកហាបណៈមួយមិនប្រាប់នាយឃ្លាំងឡើយ នាយឃ្លាំងមិនហ៊ានពោលពាក្យតិចតួចសោះ ព្រោះសេចក្តីគោរពព្រាហ្មណ៏ ។ ដល់ថ្ងៃទី២យកកហាបណៈពីរ នាយឃ្លាំងមិនហ៊ានពោលពាក្យអ្វីទៀត ។ ដល់ថ្ងៃទី៣យកមួយក្តាប់ នាយឃ្លាំងអត់ខឹងមិនបាន ក៏ស្រែកបីដងថា ចោរប្លន់កហាបណៈខ្ញុំចាប់បានហើយ ។ មនុស្សទាំងឡាយនាំគ្នាស្ទាក់ ចាប់ចងហើយពោលពាក្យថាអ្នកឯងនេះ ប្រព្រឹត្តដូចជាអ្នកមានសីលយូរយារមកហើយ ទើបទះតប់ពីរបីដៃរួចយកថ្វាយព្រះរាជា ៗ ទ្រង់ព្រះពិរោធយ៉ាងខ្លាំងមានព្រះបន្ទូលថា ម្នាលព្រាហ្មណ៏ ព្រោះហេតុអ្វីបានជាអ្នកធ្វើអំពើទុច្ចរិតបែបនេះ ? ព្រាហ្មណ៏ឆ្លើយថា បពិត្រមហារាជ ខ្ញុំព្រះអង្គមិនមែនចោរទេ ដែលខ្ញុំព្រះអង្គធ្វើយ៉ាងនេះ ដោយល្បងមើលទេតើ ឥឡូវនេះខ្ញុំព្រះអង្គដឹងច្បាស់ថា ព្រះអង្គដែលរាប់អានខ្ញុំព្រះអង្គយ៉ាងនេះព្រោះតែមានសីល មិនមែនព្រោះអ្វីទេ ។ ម្យ៉ាងទៀតក្នុងលោកទាំងមូល ឥតមានអ្វីឧត្តុង្គឧត្តម ឬជាប្រធានជាងសីលទេ ហេតុនេះខ្ញុំព្រះអង្គលែងនៅផ្ទះទៀតហើយ នឹងទៅបួសក្នុងសំណាក់ព្រះសម្មាសម្ពុទ្ធ ឯវត្តជេតពនក្នុងថ្ងៃនោះ ។ តាំងពីបានឧបសម្បទាកាលណាមក គាត់មិនដែលលះបង់កម្មដ្ធានសោះ ខំប្រឹងចំរើនវិប្បស្សនាដរាបដល់បានសម្រេចព្រះអរហត្ត ។ ( ព្រះមហា ប៉ុល សៅ និស្សិតសាលាបាលីជាន់ខ្ពស់ ) វាយបញ្ចូលអត្តបទនេះដោយកញ្ញា ហេង សំដាណែត ។ អត្តបទនេះដកស្រង់ចេញពីសៀវភៅប្រជុំនិទានជាតក ។ ដោយ៥០០០ឆ្នាំ |
