Reading Article
Public date : 30, Nov 2022 (4,189 Read)
គ្រាំក្នុងបេះដូង
|
|
|
គ្រាំក្នុងបេះដូង
កាលកូនកើតម៉ែឈឺពិតមែន តែម៉ែអាចទ្រាំបាន ព្រោះការឈឺចាប់ ព្រោះការឈឺចាប់របស់ម៉ែនាពេលនោះ មានរយៈពេលខ្លី ពេលកូនចេញចាកផ្ទៃ រួចផុតទុក្ខផុតភ័យ ម៉ែក៏លែងឈឺចាប់ ហើយម៉ែសប្បាយចិត្ត នៅពេលដែលម៉ែបានឮសម្លេង និងបានឃើញមុខកូន។ តែក្នុងគ្រានេះ ម៉ែឈឺជាងពេលណាៗទាំងអស់ឈឺជាងពេលកូនកើតចេញចាកផ្ទៃរាប់ម៉ឺនដង គឺឈឺក្នុងបេះដូង ឈឺរហូតស្ទើរតែទ្រាំលែងបាន។ បេះដូងម៉ែខ្ទិចខ្ទាំគ្រាំអស់ហើយ ដោយសារស្នាដៃកូន។ ម៉ែប្រឹងចិញ្ចឹមកូនឲ្យធំដឹងក្ដី ប្រឹងធ្វើការទាំងយប់ថ្ងៃរកលុយឲ្យកូនរៀន ប្រឹងទូន្មានប្រៀនប្រដៅកូនព្រឹកល្ងាច តែការប្រឹងប្រែងរបស់ម៉ែ បែរជាអសារបង់ព្រោះអ្វីដែលកូនតបស្នងមកម៉ែវិញ គឺមានតែភាពឈឺចាប់ហួសពណ៌នា ស្ទើរតែគ្មានជីវិតរស់លើផែនពសុធានេះនឹងគេ។ តើពេលណាទៅដែលកូនចេះគិត? ពេលណាទៅទើបកូនឲ្យតម្លៃដល់ការតស៊ូរបស់ម៉ែ? កូនមិនអាណិតដល់បេះដូងរបស់ម៉ែ ដែលគ្រាំគ្រាព្រោះតែកូនទេឬអ្វី? ក្នុងលោកនេះកូនមិនគិតមើលទៅ ថាតើមានមនុស្សប៉ុន្មាននាក់ដែលល្អនឹងកូនដូចជាម៉ែ? គឺដូចជាគ្មានទេនៅលើផែនដីនេះ គឺមានតែម៉ែទេដែលទ្រាំជាមួយនឹងទង្វើរបស់កូនបាន បើទោះបីជាកូនធ្វើបាបចិត្ត ឲ្យឈឺចាប់ខ្លាំងប៉ុណ្ណាក៏ដោយ ក៏ម៉ែនៅតែអាចទ្រាំបានដែរ គឺម៉ែទ្រាំព្រោះតែម៉ែស្រឡាញ់កូន ទ្រាំដើម្បីជីវិតកូនទ្រាំដើម្បីរស់នៅក្បែរកូន។ ការឈឺចាប់ផ្លូវចិត្តរបស់ម៉ែ គឺវាឈឺខ្លាំងណាស់ឈឺរកអ្វីប្រៀបផ្ទឹមពុំបានឡើយ កូនអើយអាសូរបេះដូងរបស់ម៉ែផង កូនដឹងទេថាម៉ែស្ទើរតែទ្រាំតទៅមុខលែងបានហើយ ងាកក្រោយមើលមកម៉ែផងណាកូនបើកូនមិនអាណិតខ្លួនឯងទេ ចូរកូនអាណិតម៉ែផងណាកូន ព្រោះជីវិតកូនគឺជាជីវិតរបស់ម៉ែ បើកូនមានបញ្ហាអ្វី ម៉ែក៏មានបញ្ហានោះដូចគ្នា គឺម៉ែគិតពីកូនគ្រប់ពេលវេលា កូនឈឺម៉ែក៏ឈឺ កូនរងទុក្ខម៉ែរងទុក្ខ កូនលំបាកម៉ែក៏លំបាក ជីវិតម៉ែមានសេចក្ដីទុក្ខព្រោះកូនរហូត គ្មានវេលាណាស្រាកស្រាន្តឡើយ ទោះបីជាក្នុងវេលាដែលកូនកំពុងតែសប្បាយរីករាយជប់លៀងស៊ីផឹកជាមួយមិត្តភ័ក្ត្រ ក៏ម៉ែនៅតែគ្រាំចិត្តដដែល ព្រោះម៉ែបារម្ភពីកូនហេតុអ្វីបានជា ជីវិតម៉ែគ្មានសេចក្ដីសុខ ម្ដងណាអ៊ីចឹង? ទោះបីដេកលក់ក៏មិនស្ងប់នៅតែគិតពីកូនបើកភ្នែកឡើងកាលណា ក៏នៅតែគិតពីកូន... ពាក្យថាកូនៗ គឺដក់ជាប់នៅក្នុងបេះដូងម៉ែជានិច្ច គ្មានថ្ងៃណាដែលម៉ែអាចភ្លេចកូនឡើយ ហើយទោះបីជាកូនធ្វើឲ្យគ្រាំចិត្ត ក៏ម៉ែនៅតែមានភក្ដីភាពចំពោះកូនដែរ។ ម៉ែល្អចំពោះកូនប៉ុណ្ណឹងហើយ តែកូននៅតែមិនអនុគ្រោះដល់ដួងចិត្តរបស់ម៉ែសោះឡើយ កូននៅតែតាមប្រម៉ាញ់បាញ់ប្រហារ បេះដូងរបស់ម៉ែដោយកិរិយាមារយាទ និងទង្វើមិនគប្បីផ្សេងៗ ធ្វើឲ្យបេះដូងរបស់ម៉ែគ្រាំគ្រាម្ដងហើយម្ដងទៀត សឹងតែមិនស្គាល់ជាតិសេចក្ដីសុខផ្លូវចិត្តសោះ នៅក្នុងជីវិតម៉ែ។ កូនអើយ! មេត្តាកូនថែទាំសុខភាពផ្លូវចិត្តរបស់ម៉ែផង កុំឲ្យផ្លូវចិត្តរបស់ម៉ែគ្រាំគ្រា ក្រៀមស្វិតជាងនេះអីសណ្ដោសប្រណី បន្តជីពចរជីវិតអ្នកម្ដាយថ្លៃ ឲ្យរស់នៅបានឃើញវង់ភ័ក្ត្ររបស់បុត្រចរណៃ តទៅទៀតផងណាកូន!!!។ ធម្មជាតិនាលោកិយ តែងមានយប់ មានថ្ងៃមានវស្សារ មានប្រាំង មានភ្លៀង មានរាំង ថ្ងៃរះហើយតែងលិច តែសម្រាប់ធម្មជាតិចិត្តរបស់ម៉ែគ្មានទេភាពភ្លឺស្វាង មានតែភាពងងឹតសូន្យ ព្រោះកូនធ្វើឲ្យម៉ែមានតែសេចក្ដីទុក្ខសោក រកសុខគ្មានសោះតែម៉ែសុខចិត្តគ្រាំគ្រាក្នុងចិត្ត ក៏ម៉ែមិនគិតបោះបង់កូនចោលដែរ... ។ ដកស្រង់ចេញពីសៀវភៅ សូរសៀងសំនៀងម៉ែ រៀបរៀងដោយ យុវសមណ ឆិម ប៊ុនឆា ដោយ៥០០០ឆ្នាំ |
Articles you may like
