Reading Article
Public date : 24, Jul 2019 (12,202 Read)
គំនុំសងសឹក
|
|
|
គំនុំសងសឹក
កូនជាទីស្រឡាញ់ កូនធ្លាប់មើលភាពយន្តចិន មានរឿងពិភពគុនហាត់ចម្រើនកម្លាំងធាតុដើម្បីប្រយុទ្ធស្លាប់រស់ ដោយកាន់យកគតិមួយថា គំនុំឈាមត្រូវតែយកឈាមមកសង ឬគំនុំត្រូវតែសងសឹក ជាចុងក្រោយ បក្សពួកទាំងពីរខាងត្រូវស្លាប់ស្ទើរតែទាំងអស់ ។ នោះគ្រាន់តែជាភាពយន្តតែបើគិតឲ្យល្អ នាំឲ្យបាននូវគំនិតមួយថា គំនុំនិងការសងសឹកនោះមិនល្អឡើយ ។ ជាការពិតណាស់កូនអើយ គំនុំសងសឹកវាមិនល្អឡើយ ។ បើមានអ្នកណាមកធ្វើឲ្យកូនទាស់ចិត្ត រហូតដល់ធ្ងន់ធ្ងរយ៉ាងណា បើកូនទ្រាំបាន ល្អណាស់កូនគឺកូនត្រូវតែទ្រាំង ។ កូនចាំបាច់យកចិត្តទុកដាក់ ជ្រមុលទៅក្នុងរឿងសងសឹកនោះធ្វើអ្វី វាធ្វើឲ្យកូនញាប់ញ័រក្តៅក្រហាយចិត្ត ខឹងក្រោធពុះកញ្ជ្រោល រហូតរកសុខស្ងប់មិនបាននិងមិនអស់ពេលវេលាទៅទទេដោយឥតប្រយោជន៍ ។ កូនអើយគំនុំគឺជាភ្លើងវាដុតរោលចិត្តនិងគំនិតរបស់យើងឲ្យក្តៅរោលរាលគ្រប់ពេលវេលា ធ្វើឲ្យយើងងប់ជ្រប់នៅតែជាមួយនឹងគំនិតគិតសងសឹកជានិច្ច ជាបិសាចបំផ្លាញពេលវេលា និងសេចក្តីសុខក្នុងជីវិតយើង ព្រមទាំងគ្រួសាររបស់យើងយ៉ាងពិតប្រាកដតែម្តង ។ ព្រះសម្មាសម្ពុទ្ធទ្រង់ត្រាស់ថា (អ្នកឈ្នះតែងប្រទះនូវពៀរ អ្នកចាញ់រមែងដេកជាទុក្ខ ឯអ្នកដែលស្ងប់រម្ងាប់បានលះបង់នូវការឈ្នះចាញ់ចោលហើយ រមែងនៅជាសុខគ្រប់ឥរិយាបថទាំង៤ ) ។ កូនអើយ បើអ្នកណាមកធ្វើឲ្យកូនខឹងក្រោធ កូនអាចចោលបានក៏ចោលទៅ ឲ្យអភ័យបានក៏ឲ្យអភ័យទៅចិត្តកូននឹងបានសប្បាយមិនខូចសុខភាពរបស់ចិត្តឡើយ ។ ការគិតតែពីរឿងសងសឹក គ្រាន់តែដើម្បីអស់គំនុំដើម្បីឲ្យសមចិត្តនោះ ពេលខ្លះអាចធ្វើឲ្យសមចិត្ត និងសប្បាយ ចិត្តបាន ប៉ុន្តែបានត្រឹមមួយពេល មួយរយៈប៉ុណ្ណោះ ព្រោះផលនៃការសងសឹកបាននោះ នៅមានទៀត តែលើកក្រោយនោះកាចសាហាវណាស់ វាតាមមកឲ្យយើងមានទុក្ខខ្លាំងក្លាអាចរហូតមួយជីវិតក៏បាន ដូចជា សងសឹកហើយត្រូវរត់គេច មិនអាចរស់នៅក្នុងកន្លែងដើមបានសងសឹកហើយ ខ្លួនឯងត្រូវទៅដេកនៅក្នុងគុកដប់ឆ្នាំ ម្ភៃឆ្នាំ ឬរហូតអស់មួយជីវិតដូច្នេះមិនប្រសើរឡើយ ហើយត្រូវជាប់ពៀរវេរានឹងគ្នាភ្លើងគំនុំបាននោះ នៅត្រង់ការឲ្យអភ័យ និងនៅត្រង់ការមិនចងពៀរ មិនមែននៅត្រង់ការចងពៀរនោះទេ ព្រោះពៀរវេរាត្រូវស្ងប់ដោយសារការមិនចងពៀរជាប្រាកដ បើភ្លើងគំនុំនៅមិនទាន់រលត់ទេ គឺមិនអាចរកសេចក្តីសុខស្ងប់ក្នុងជីវិតបានឡើយ ។ អត្តបទនេះដកស្រង់ចេញពីសៀវភៅៈ ពាក្យពេចន៍ម៉ែឪ រៀបរៀងដោយៈ អគ្គបណ្ឌិត ធម្មចារ្យ ប៊ុត សាវង្ស វាយអត្តបទដោយៈ កញ្ញា ជា ម៉ានិត ដោយ៥០០០ឆ្នាំ |
