ទោសលួចទ្រព្យគេ និងទោសលក់សុរា

ស្តាប់សំឡេង

រឿងនាងវិមានប្រេត
( ចាក បេ. ខុ )
( ទោសលួចទ្រព្យគេ និងទោសលក់សុរា )

កាលកន្លងទៅហើយ ក្នុងក្រុងពារាណសី មានស្រ្តីក្រមុំម្នាក់ឈ្មោះ កល្យាណី មានរូបល្អជាទីស្រលាញ់ពេញចិត្តចំពោះមហាជន ដែលបានឃើញរូបនាង ។ ថ្ងៃមួយមានបុរសម្នាក់ ចាប់ចិត្តស្រលាញ់ បានចូលទៅនិយាយជាច្រើនដង នាងមិនព្រមយក ក៏កើតទោសៈ ព្យាបាទនាង យកថ្នាំជម្រុះសក់ទៅជួលនាងទាសី ឲ្យដាក់ក្នុងប្រអប់រមៀត ដល់នាងទៅមុជទឹកនាកំពង់ក្បែរផ្ទះ យករមៀតនោះកក់ក្បាល សក់ក៏ជ្រុះអស់គ្មានសល់មួយសសៃ នៅតែរលាដ៏ក្បាលទទេ នាងកើតសេចក្តីអៀនខ្មាស ក៏យកក្រមាទទូក្បាលរត់ភៀសខ្លួន ទៅនៅស្រុកចុងកាត់មាត់ញក ឆ្ងាយពីស្រុកកំណើត ។

រឿងដទៃស្លេះតែប៉ុណ្ណេះ នឹងនិយាយតែអំពីនាងកល្យាណី ដល់នាងទៅនៅចុងកាត់មាត់ញក យូរទៅសក់ក៏ឥតមានដុះឡើងវិញ ប្តីនាងក៏មិនយក ទៅជាអ្នកទ័លក្រទើបប្រកបរបរបិទស្រាលក់ ពួកប្រមឹកទាំងឡាយតែងចោមរោមរាននាងជានិច្ចរាល់ថ្ងៃ ។ កាលនោះមានប្រមឹកពីរនាក់ដេកលក់ នាងលួចសំរាតយកសំពត់អាវអស់ នៅអាក្រាតកាយទទេ ពួកប្រមឹកដឹងខ្លួនឡើង មានសេចក្តីអៀនខ្មាស ក៏នាំគ្នារត់ទៅផ្ទះអស់ទៅ ។

ថ្ងៃក្រោយមកនាងកល្យាណី បានឃើញព្រះខីណាស្រព ១ អង្គនិមន្តទៅបិណ្ឌបាត មានសេចក្តីជ្រះថ្លា ក៏និមន្តចូលគង់លើអាសនៈក្នុងផ្ទះរបស់ខ្លួន ហើយចាត់ចែងប្រគេនប្រអូលលាយដោយប្រេងល្ង កាលបើព្រះខីណាស្រពឆាន់ហើយ នាងតាំងសេចក្តីប្រាថ្នាថា សូមឲ្យមានរូបល្អ មានសក់ល្អសសៃល្អិតដូចរោមទ្រាយ ព្រះខីណាស្រព ធ្វើអនមោទនាហើយនិមន្តទៅទីដទៃទៀត ។

ដល់នាងអស់អាយុ បានកើតជាប្រេតញី មានរូបល្អ សក់ដុះល្អដូចប្រាថ្នា ស្ថិតក្នុងវិមានមាសតែម្នាក់ឯងកណ្តាលមហាសមុទ្រ ប៉ុន្តែគ្មានសំពត់អាវស្លៀកពាក់អាក្រាតកាយទទេ យកសក់ក្បាលគ្របខ្លួន មានសេចក្តីអៀនខ្មាសយ៉ាងខ្លាំងតែម្នាក់ឯង មិនដែលចេញទៅណា នៅតែក្នុងវិមានស្ងាត់ជ្រងំ កណ្តាលមហាសមុទ្រនោះឯង ។

សម័យនោះមានឈ្មួញសំពៅ ៧០០ នាក់ឆ្លងកាត់មហាសមុទ្រ ទៅប្រកបការងារឯត្រើយម្ខាង ត្រូវខ្យល់ព្យុះបក់បោករសាត់ចុះឡើងនៅកណ្តាលមហាសមុទ្រនោះ ក៏ទៅជួបនឹងវិមានរបស់នាងប្រេតនោះ ។ អ្នកសំពៅទាំងឡាយ ឃើញរូបនាងស្អាតល្អស្រស់នៅតែម្នាក់ឯង ក៏សំគាល់ថាទេពធីតា បានអញ្ជើញនាងឲ្យចេញមកក្រៅ ដើម្បីចរចាគ្នាឲ្យដឹងដំណើររឿង នាងមិនព្រមចេញមកសោះដោយសេចក្តីអៀនខ្មាសគ្របសង្កត់ខ្លាំង ពួកអ្នកសំពៅចេះតែទទួចសួរថា នាងមានរូបល្អយ៉ាងនេះ ពួកយើងមិនដែលឃើញសោះ តើនាងជាទេពធីតាឬ ? សួរញយៗ ពេកនាងក៏ប្រាប់ថា ខ្ញុំនេះជាប្រេតទេ ឈ្មោះវិមានប្រេត ទាំងពីកើតមក ខ្ញុំមិនដែលបានសំពត់ស្លៀកសោះ ព្រោះផលអាក្រក់ដែលខ្ញុំលួចសំពត់អ្នកប្រមឹកពីជាតិមុន ដែលខ្ញុំមានរូបល្អ មានចំណីអាហារទិព្វ វិមានមាស ប្រតិស្ថាននៅកណ្តាលមហាសមុទ្រនេះ កើតឡើងដោយផលបុណ្យ ដែលខ្ញុំបានប្រគេនប្រអូលដល់ព្រះខីណាស្រព ។

ពួកអ្នកសំពៅសួរទៀតថា នាងមកកើតនៅទីនេះប៉ុន្មានឆ្នាំហើយ នាងប្រាប់ថា រាប់ឆ្នាំមិនបានទេ ចំនួន ១ កប្បមកហើយ ។ នាយសំពៅមានសេចក្តីអាណិតដល់នាងប្រេតនោះពន់ពេក បានយកសំពត់ ១ គូហុចឲ្យទៅស្លៀក នាងលើកដៃសំពះអង្វរថា ខ្ញុំទទួលយកមកស្លៀកពុំបានទេ ព្រោះខ្ញុំជាប្រេត បើលោកមេត្តាឲ្យទានខ្ញុំ សូមឲ្យទៅព្រះសង្ឃ ឬ អ្នកមានសីលបរិសុទ្ធ ហើយឧទ្ទិសផលឲ្យខ្ញុំ ទើបខ្ញុំទទួលបាន ។

គួរអស្ចារ្យណាស់ ក្នុងសំពៅគ្មានព្រះសង្ឃមួយអង្គសោះ មានតែឧបាសកម្នាក់ មានសីលបរិសុទ្ធ នាយសំពៅក៏ជូនសំពត់ទៅឧបាសកនោះ ហើយឧទ្ទិសផលចំពោះដល់ប្រេតនោះ ស្រាប់តែប្រេតបានសំពត់ទិព្វស្លៀកដណ្តប់ភ្លាម ( នេះរឿងចម្លែក តាមដឹងរៀងមកថា ទាល់តែឲ្យដល់សង្ឃទើបឧទ្ទិសផលដល់ប្រេតបាន សូមអ្នកអានទាំងឡាយពិចារណាមើល តើសមហេតុផលដែរឬទេ ? )

នាងវិមានប្រេតកាលបើបានសំពត់ស្លៀកពាក់ហើយ ក៏និម្មិតយកអាហារទិព្វជប់លៀងអ្នកសំពៅនោះ ឲ្យឆ្អែតស្កប់ស្កល់គ្រប់គ្នា ទើបយំសោកប្រាប់អ្នកសំពៅថា អស់លោកអើយ ! ខ្ញុំជាស្ត្រីកម្មក្រាស់ណាស់នៅតែ ៤ ខែទៀតទេ ខ្ញុំត្រូវអស់អាយុធ្លាក់ទៅកើតក្នុងនរកហើយ ព្រោះទោសដែលខ្ញុំបិទស្រាលក់ពីជាតិមុន ។

នាយសំពៅ និងឧបាសក មានសេចក្តីមេត្តាករុណាប្រាប់ថា បើនាងចង់បានសុខ នាងត្រូវយកព្រះពុទ្ធ ព្រះធម៌ ព្រះសង្ឃ ជាទីពឹងទីរឭកស្មើដោយជីវិត នាងលើកដៃសំពះទទួលថា សាធុ ៗ ក៏នឹកភាវនាគុណព្រះរតនត្រ័យក្នុងចិត្តជាប់ជានិច្ច ។ ដល់ពេលស្ងប់ខ្យល់ នាយសំពៅលានាងប្រេតត្រឡប់មកនគរវិញ នាងបានផ្ញើសម្បត្តិទិព្វ មានមាសប្រាក់ជាដើប មកបូជាព្រះសម្ពុទ្ធបរមគ្រូ កាលនោះព្រះអង្គគង់នៅវត្តជេតពន ។

នាយសំពៅ និងឧបាសកទទួលបញ្ញើ ក៏ចេញសំពៅមក លុះសំពៅមកដល់នគរហើយ ក៏យកគ្រឿងសក្ការដែលនាងប្រេតផ្ញើ ទៅបូជាព្រះ មានព្រះភាគៗ ទ្រង់ទទួលហើយ ប្រជុំពុទ្ធបរិស័ទ សំដែងធម្មទេសនា ប្រារព្វយករឿងនោះជាហេតុ ទីបំផុតព្រះអង្គទ្រង់ត្រាស់ថា នាងវិមានប្រេតនោះនៅ ៤ ខែទៀតអស់អាយុហើយ ត្រូវទៅកើតក្នុងនរក ដោយអំណាចបិទស្រាលក់ ប៉ុន្តែដោយអំណាចសទ្ធា ដែលនាងជឿចំពោះគុណព្រះរតនត្រ័យ ហើយបានបូជាចំពោះតថាគត ដល់គំរប់ ៤ខែនាងអស់អាយុទៅ បានទៅកើតជាទេពធីតា នៅស្ថានត្រៃត្រឹងសួគ៌ សោយសម្បត្តិទិព្វយ៉ាងធំ ។

ឯនាងវិមានប្រេតកាលបើដល់កំណត់គ្រប់ ៤ ខែ ហើយក៏អស់អាយុលាកំណើតពីប្រេត ទៅកើតជាទេពធីតានៅស្ថានត្រៃត្រឹងសួគ៌ សោយទិព្វសម្បត្តិជាក្សេមក្សាន្តហោង ។

ដកចេញពីសៀវភៅប្រជុំនិទានជាតក
ដោយ៥០០០ឆ្នាំ

Array
(
    [data] => Array
        (
            [0] => Array
                (
                    [shortcode_id] => 1
                    [shortcode] => [ADS1]
                    [full_code] => 
                )

            [1] => Array
                (
                    [shortcode_id] => 2
                    [shortcode] => [ADS2]
                    [full_code] => c
                )

        )

)

ទោស​លួច​ទ្រព្យ​គេ​ និង​ទោស​លក់​សុ​រា

ទោសលួចទ្រព្យគេ និងទោសលក់សុរា