អានអត្ថបទ
ផ្សាយ : ២៤ កក្តដា ឆ្នាំ២០១៩ (អាន: ២០,០៧៣ ដង)
មនុស្សចិត្តខ្វាក់
|
|
|
មនុស្សចិត្តខ្វាក់
កូនជាទីស្រឡាញ់ កូនធ្លាប់បានឮពាក្យនេះហើយគឺ (ឲ្យសម្លឹងមើលសេចក្តីល្អរបស់អ្នកដទៃ) ។ ពាក្យនេះប្រាប់ឲ្យយើងហាត់សម្លឹងមើលផ្នែកល្អរបស់មនុស្សដែលយើងស្គាល់ មនុស្សដែលយើងគប់រក ឬមនុស្សដែលនៅរួមជាមួយយើង ។ មនុស្សយើងដែលនៅមានកិលេសនេះ សុទ្ធតែមានចំណុចខ្វះខាតក្នុងខ្លួនគ្រប់គ្នាទាំងអស់ មិនមានអ្នកណា ដែលបរិសុទ្ធផូរផង់គ្រប់យ៉ាងរកកន្លែងតិះដៀលមិនបាននោះឡើយ ។ កាលបើកូនស្រឡាញ់រាប់អាន និងគប់រកអ្នកណាហើយ កូនត្រូវសម្លឹងរកចំណុចល្អរបស់អ្នកនោះឲ្យច្រើន ។ ចំណែកចំណុចមិនល្អវិញ បើគ្រាន់តែបន្តិចបន្តួចទេ ត្រូវរំលងចោលទៅ លើកយកចំណុចល្អដែលមានច្រើនជាងឲ្យមកប្រាកដ ។ ដូច្នេះរមែងធ្វើឲ្យរលុបបាត់នូវចំណុចខ្វះខាតរបស់គេ ឬក៏សាបរលាបទៅបន្តិចម្តងៗ មិនប្រាកដឡើងនូវការទាស់ចិត្តការស្អប់ឬគំនុំគុំគួនក្នុងចិត្តកូនឡើយ ។ តាមពិត មនុស្សយើងគ្រប់គ្នា តែងតែមាននូវចំណុចល្អ បើយើងមើលដោយចិត្តធម៌សប្បុរស ។ មនុស្សដែលមានចិត្តប្រកបដោយធម៌សប្បុរស រមែងមើលឃើញសេចក្តីល្អរបស់អ្នកដទៃបានដោយងាយ ។ ចំណែកមនុស្សដែលមានចិត្តមិនប្រកបដោយធម៌សប្បុរស ឬថា ព្រោះខ្វះយុត្តិធម៌ សូម្បីអ្នកដទៃមានសេចក្តីល្អធំធេង ប្រាកដដូចជាភ្នំធំនៅនឹងមុខក៏ដោយ ក៏មើលមិនឃើញដែរ ។ មនុស្សភ្នែកល្អធម្មតា តែថាមើលមិនឃើញសេចក្តីល្អរបស់អ្នកដទៃគេហៅថា មនុស្សចិត្តខ្វាក់ ។ មនុស្សចិត្តខ្វាក់ រមែងមើលមិនឃើញសេចក្តីល្អរបស់អ្នកណាឡើយ ព្រោះខ្មោចអគតិទាំង៤ គឺការលំអៀងព្រោះស្រឡាញ់ ព្រោះស្អប់ ព្រោះល្ងង់ និងព្រោះភ័យខ្លាច ស្ថិតនៅក្នុងខ្លួនគេជានិច្ច ដូច្នេះយើងរកយុត្តិធម៌ពីមនុស្សចិត្តខ្វាក់បានដោយលំបាក សូម្បីតែខ្លួនគេផ្ទាល់ក៏មិនដឹងថា ខ្លួនឯងមានចិត្តខ្វាក់យ៉ាងណាដែរ ។ ការគប់រកមនុស្សខ្វាក់ភ្នែកមិនជាអ្វីឡើយ តែបើគប់រកមនុស្សចិត្តខ្វាក់ ពិតជាមិនល្អទេ ។ ធ្វើល្អជាមួយមនុស្សចិត្តខ្វាក់កូនត្រូវដឹងឲ្យហើយថា គេមិនអាចនឹងមើលឃើញសេចក្តីល្អរបស់កូនឡើយ ។ ដែលម៉ែឪប្រាប់កូនដូចពោលមកហើយនេះ គឺដើម្បីឲ្យកូណដឹងថា មនុស្សយើងច្រើនស្គាល់មនុស្សដល់ជម្រៅចិត្តរបស់គេ កាលបើស្គាល់យ៉ាងណាហើយកូននឹងបានប្រយ័ត្នប្រយែងខ្លួនឯងផង រៀបចំចិត្តឲ្យត្រូវល្អផង ដូចពាក្យចាស់ពោលថា (ផ្កាប់សេ្តចតោងតាមព្រហទយា ផ្គាប់រាស្ត្រដូចគ្នាតោងមើលចិត្ត) ព្រមជាមួយគ្នានោះ កូនត្រូវកុំធ្វើខ្លួនឲ្យជាមនុស្សចិត្តខ្វាក់ប៉ុណ្ណឹងជាការស្រេច ។ អត្តបទនេះដកស្រង់ចេញពីសៀវភៅៈ ពាក្យពេចន៍ម៉ែឪ រៀបរៀងដោយៈ អគ្គបណ្ឌិត ធម្មាចារ្យ ប៊ុត សាវង្ស វាយអត្តបទដោយៈ កញ្ញា ជា ម៉ានិត ដោយ៥០០០ឆ្នាំ |
អត្ថបទអ្នកអាចអានបន្ត
