Reading Article
Public date : 26, Jul 2019 (14,710 Read)
គុណនៃសេចក្តីលំបាក
|
|
|
កូនជាទីស្រឡាញ់
ឪពុកម្តាយ ក៏ដូចគ្នានឹងមនុស្សទាំងឡាយឯទៀតដែរ គឺក្រៅអំពីមិនត្រូវការឲ្យខ្លួនឯងលំបាកហើយ នៅមិនត្រូវការឲ្យកូនរបស់ខ្លួនមាននូវសេចក្តីលំបាកផងទៀត ។ មិនមានម៉ែឪណា ដែលប្រាថ្នាឲ្យកូនខ្លួនឯងក្រីក្រលំបាកតោកយ៉ាកឡើយ ប៉ុន្តែពេលខ្លះ កូននៅតែមានសេចក្តីលំបាក ព្រោះឪពុកម្តាយមិនអាចធ្វើឲ្យកូនសុខសប្បាយបានគ្រប់យ៉ាងនោះឯង ។ ក្នុងសេចក្តីនេះ កូនត្រូវចាំទុកថា សេចក្តីលំបាកនោះ វាមិនមែនអាក្រក់ មានពិសកាចសាហាវ ធ្វើឲ្យមនុស្សយើងទុក្ខលំបាកទៅតែម៉្យាងនោះទេ ។ បើយើងសម្លឹងមើលក្នុងការសិក្សា ឬមើលក្នុងផ្នែកមួយផ្សេងទៀត សេចក្តីល្អ ឬប្រយោជន៍នៃការលំបាកនោះៗ ក៏អាចប្រព្រឹត្តទៅបាន គឺសេចក្តីលំបាកធ្វើឲ្យយើងរឹងប៉ឹងមាំមួនខ្លាំងឡើង ធ្វើឲ្យមនុស្សយើងពូកែគិត និងធ្វើឲ្យបានជាអ្នកធំទៀតផង ប្រៀបដូចដែកដែលគេដុតឲ្យរឹងដូច្នោះឯង ។ ការលំបាក ប្រដៅឲ្យមនុស្សយើងពូកែក្នុងការជួយខ្លួនឯង ព្រោះត្រូវតស៊ូ ក្រាញននៀល ដើម្បីយកឈ្នះ សេចក្តីលំបាកនោះៗ ។ មានមនុស្សមិនតិចនាក់ដែរទេ ដែលគេបានល្អមកអំពីសេចក្តីលំបាក ដោយកាន់គំនិតថា " លំបាកមុនស្រណុកក្រោយ " ពោលគឺ មានការអត់ធន់ព្យាយាម នៅរវាងសេចក្តីលំបាក និងភាពស្រណុកសុខសប្បាយថ្លៃថ្នូររុងរឿង ។ ផ្ទុយមកវិញ ក៏មិនតិចនាក់ដែរ ដែលជាមនុស្សស្គាល់តែសប្បាយតាំងពីកើតមក មិនដែលស្គាល់ មិនដែលជួបនូវសេចក្តីលំបាកឡើយ លុះដល់មានហេតុនាំឲ្យសេចក្តីលំបាកកើតឡើង ក៏ស្ទើរតែជួយខ្លួនឯងមិនរួច ធ្វើអ្វីក៏មិនកើត ចាប់អ្វីក៏មិនជាប់ ការងារធ្ងន់ស្រាលមិនចេះធ្វើទាំងអស់ ទម្រាំតែបានរស់ស្ទើរតែស្លាប់ទៅហើយ ។ មានខ្លះទ្រាំនឹងការលំបាកមិនបាន ក៏ត្រូវបាត់បង់ជីវិតទៅ ។ ដូច្នេះ កូនកុំទៅខ្លាចសេចក្តីលំបាកធ្វើអ្វី ត្រូវចាំទុកថា សេចក្តីលំបាកជាគ្រូបង្វឹក ។ កូនត្រូវលត់ដំខ្លួនជាមួយនឹងសេចក្តីលំបាកដោយសេចក្តីអត់ធន់ ត្រូវយកផលកម្រៃពីសេចក្តីលំបាក ចម្រើនគុណធម៌ក្នុងចិត្ត និងយកសេចក្តីលំបាកជាមេរៀន ដែលកូនត្រូវតែសិក្សាថា អាត្មាអញ មិនវិលត្រឡប់ទៅរកសេចក្តីលំបាកទៀតឡើយ ។ ភ្លើងឆេះខ្ទេចព្រៃទៀតអនេក តែធ្វើឲ្យដែករឹងរឹតតែរឹង
ទុក្ខដុតមនុស្សខ្សោយឲ្យប្រាសទីពឹង តែបែរមនុស្សរឹងត្រាស់ដឹងសច្ចៈ ។ មិនមានអ្វីសល្អជាងគុណធម៌ ខន្តីបរវតស៊ូឥតអាក់ ទឹកតែមួយផ្តិលត្រឹមសើមប្រឡាក់ ព្យាយាមដងចាក់ដាក់ពេញអាងធំ ។ វីរោ ប្រែថាអ្នកក្លាអង់អាច ទុក្ខខ្លាំងមិនខ្លាចព្រោះអាចផ្សំផ្គុំ ព្យាយាមខន្តីបញ្ញាអប់រំ ឈ្នះអស់ទុក្ខធំជួបជុំគុណគាប់ ។ លទ្ធផលការងារជាតម្លៃមនុស្ស ធ្វើការដូចព្យុះជម្រុះអភ័ព្វ ជម្នះឧបសគ្គប្រចក្សកំណប់ គុណធម៌ជាទ្រព្យជាប់តាមជីវិត ។ មនុស្សដែករឹងប៉ឹងតែមិនរឹងរូស ព្យាយាមជម្រុះមានះក្នុងចិត្ត ទន់កាយវាចាមេត្តាមានពិត តែរឹងប្រព្រឹត្តសុចរិតដូចដែក ។
|
Articles you may like
